Австралияда «омикрон» штаммидан биринчи ўлим қайд этилди

Австралияда коронавируснинг «омикрон» штаммидан вафот этиш бўйича биринчи ҳолат қайд этилди. Бу ҳақда Янги Жанубий Уэльс соғлиқни сақлаш департаментининг Twitter’даги саҳифасида айтилган.

Қайд этилишича, коронавирусга қарши вакцинанинг икки дозаси билан эмланган кекса эркак Сиднейдаги Royal Prince Alfred Hospital касалхонасида вафот этган. Соғлиқни сақлаш департаменти беморнинг саломатлиги билан боғлиқ бошқа муаммолар ҳам бўлганини қўшимча қилган.

2 декабрь куни австралиялик олимлар ва шифокорлар мамлакатда коронавируснинг «омикрон» штаммини юқтирганлар орасида ҳозирча касалликнинг оғир ҳолатлари қайд этилмаганини хабар қилганди. Бу ушбу штаммга инфекциянинг бошқа турларидан хавфлироқ, деб қарамаслик кераклигини англатади. Аммо «омикрон» штаммининг хавфлилиги тўғрисида далилларнинг йўқлиги унинг мутлақо зарарсиз эканини англатмайди, дея таъкидлаган олимлар.

Аввалроқ Германияда «омикрон» штаммига чалинган одамлар орасида биринчи ўлим қайд этилганди. Борис Жонсон Британияда «омикрон» штамми билан касалланган бемор вафот этганини маълум қилганди. Шунингдек, АҚШда ҳам «омикрон» билан боғлиқ биринчи ўлим кузатилган.

Жаҳон соғлиқни сақлаш ташкилоти «омикрон» дунёнинг юздан ортиқ мамлакатида аниқлангани ҳақида хабар берганди.