Avstraliyada koronavirusning “omikron” shtammidan vafot etish bo‘yicha birinchi holat qayd etildi. Bu haqda Yangi Janubiy Uels sog‘liqni saqlash departamentining Twitter’dagi sahifasida aytilgan.
Qayd etilishicha, koronavirusga qarshi vaksinaning ikki dozasi bilan emlangan keksa erkak Sidneydagi Royal Prince Alfred Hospital kasalxonasida vafot etgan. Sog‘liqni saqlash departamenti bemorning salomatligi bilan bog‘liq boshqa muammolar ham bo‘lganini qo‘shimcha qilgan.
2-dekabr kuni avstraliyalik olimlar va shifokorlar mamlakatda koronavirusning “omikron” shtammini yuqtirganlar orasida hozircha kasallikning og‘ir holatlari qayd etilmaganini xabar qilgandi. Bu ushbu shtammga infeksiyaning boshqa turlaridan xavfliroq, deb qaramaslik kerakligini anglatadi. Ammo “omikron” shtammining xavfliligi to‘g‘risida dalillarning yo‘qligi uning mutlaqo zararsiz ekanini anglatmaydi, deya ta’kidlagan olimlar.
Avvalroq Germaniyada “omikron” shtammiga chalingan odamlar orasida birinchi o‘lim qayd etilgandi. Boris Jonson Britaniyada “omikron” shtammi bilan kasallangan bemor vafot etganini ma’lum qilgandi. Shuningdek, AQShda ham “omikron” bilan bog‘liq birinchi o‘lim kuzatilgan.
Jahon sog‘liqni saqlash tashkiloti “omikron” dunyoning yuzdan ortiq mamlakatida aniqlangani haqida xabar bergandi.
Izoh (0)