НАТО бош котиби Йенс Столтенберг 12 январь куни НАТО—Россия кенгашининг йиғилишини ўтказишга қарор қилди. Бу ҳақда НАТОдаги манбасига таяниб, Anadolu агентлиги хабар берди.
Столтенберг ушбу қарорни НАТО—Россия кенгашининг раиси сифатида қабул қилган.
«Биз мазкур масала бўйича Россия билан алоқада бўлиб турибмиз», — деди манба. Шунингдек, 12 январь куни Брюсселда НАТОга аъзо давлатлар Бош штаб бошлиқларининг йиғилиши бўлиб ўтади.
Reuters агентлигининг Германия ҳукуматидаги манбаларга таяниб, хабар беришича, Россия президенти маъмурияти раҳбари ўринбосари Дмитрий Козак ва Германия канцлерининг ташқи сиёсат бўйича маслаҳатчиси Йенс Плетнер ҳам январь ойида Украина масаласида юзма-юз учрашув ўтказишга қарор қилган.
Манбаларга кўра, икки давлат вакили бу ҳақда 23 декабрь кунги узоқ давом этган телефон суҳбатида келишиб олган.
Reuters бундай учрашувни «камдан-кам учрайдиган» деб атади ва сўнгги пайтларда давлат раҳбарлари ўртасида Украина муаммоси бўйича телефон қўнғироқлари тез-тез амалга оширилаётганини, бироқ юқори мартабали амалдорлар ўртасида юзма-юз учрашувлар камдан-кам бўлаётганини қайд этди.
Вашингтондан фарқли ўлароқ Берлин Россиянинг Украинага бостириб кирмоқчилигига шубҳа қилмоқда ва кескинликни камайтиришга интилмоқда, деди Германия ҳукуматидаги икки манба Reuters агентлигига. «Германия томонининг мақсади ‘норманд форматиъни тезроқ тиклашдир», — деди агентлик суҳбатдошларидан бири.
Reuters агентлигининг таъкидлашича, Германиянинг янги канцлери Олаф Шольц ўз лавозимига киришгач, Россия билан мамлакат ҳарбийларининг ғарбий чегараларда жойлашуви бўйича мулоқот қилиш зарурлигини таъкидлаган. Шу билан бирга, у Россия Украинага бостириб кирадиган бўлса, унга қарши санкциялар жорий этиш ғоясини қўллаб-қувватлаган.
Декабрь ойи ўрталарида Шолс Германия «норманд формати»га қайтиш ва уни қайта ишга туширишни режалаштираётгани маълум қилганди. У бу масалани Франция президенти Эммануэль Макрон ва Украина президенти Владимир Зеленский билан муҳокама қилган.
Кремль «норманд формати»даги музокараларга тайёрлигини билдирган, бироқ бунинг учун «умумий тушунчани акс эттирувчи» ҳужжат тайёрлаш зарурлигини таъкидлаган.
Маълумот учун, «Норманд формати» ёки «Норманд тўртлиги» — Германия, Россия, Украина ва Франция раҳбарларидан иборат гуруҳ бўлиб, у 2014 йилда Украина шарқидаги вазиятни ҳал қилиш учун тузилган.
Изоҳ (0)