Лондон полицияси 19 ёшли британияликнинг қиролича Елизавета II ни гўёки ўлдириш мақсадида Виндзор қасри ҳудудига ноқонуний киргани бўйича олиб борилаётган тергов тафсилотларини маълум қилди. Гумонланувчи қўлга олиниб, фуқароларнинг руҳий саломатлиги тўғрисидаги қонунга мувофиқ психиатрия клиникасига юборилган.
Воқеа 25 декабрь, Рождество куни эрталаб содир бўлган. Йигит арқонли нарвондан фойдаланиб, Виндзор қасрини ўраб турган металл тўсиқдан ошиб ўтмоқчи бўлган. Бироқ у панжарадан бир неча метрдан узоқроқ ҳаракатлана олмаган – уни хавфсизлик камералари ёрдамида пайқаб қолишган ва зудлик билан қўлга олган, шундан сўнг полицияга олиб кетилган. Психиатр кўригидан ўтгач, у мажбурий даволанишга юборилди.
Воқеа тафсилотлари ОАВга 26 декабрь куни маълум бўлди. The Sun гумонланувчи томонидан олинган видеони қўлга киритди, унда қора ҳуди кийган, юзида ниқоб ва қўлида арбалет камон ушлаган одам овозини ўзгартирган ҳолда камерага қараб, улар «қироличани ўлдиришни» истайди ва «бу қасос», деган гапларни айтган.
«Қилган ва қиладиган ишларимдан афсусдаман. Мен қиролича Елизаветани ўлдиришга ҳаракат қиляпман», — дейди гумонланувчи. У ўзининг сикх эканини ва 1919 йилда Амритсарда Британия империясининг мустамлакачи кучлари томонидан қатл қилинган сикхлар учун («Амритсар қирғини» деб аталади), шунингдек, ирқий адолатсизликлар туфайли «ўлдирилган, хўрланган ва камситилган» ҳар бир киши учун қасос олишни хоҳлаётганини айтади.
Скотланд-Ярднинг махсус бўлинмаси ҳозирда видеони ўрганиб чиқмоқда, шунингдек, жиноятчининг Рождество куни эрталаб Виндзор қасрига қандай келганини аниқламоқда, ўша пайтда жамоат транспорти ҳали ишламаётган эди.
Изоҳ (0)