Ироқ пойтахтида парламент сайлови натижаларига қарши норозилик намойишлари бўлиб ўтмоқда

Ироқ пойтахти Бағдоднинг «Яшил зонаси»да парламент сайлови натижаларини эълон қилиш кутилаётган фонда норозилик намойишлари бўлиб ўтмоқда. Бу ҳақда Аlbаwа хабар берди.

Ироқда 10 октябрда ўтказилган парламент сайловлари натижаларини қоралаш учун Бағдоддаги хорижий ва ҳукумат муассасалари жойлашган «Яшил зона» ташқарисида юзлаб одамлар тўпланди.

Намойишчилар сохталаштирилгани даъво қилинаётган сайловларда гўёки ўғирланган овозларни қайтаришга чақирувчи баннерларни кўтариб олган. Маҳаллий матбуот хабарларига кўра, намойишчилар бир қанча йўлларни тўсиб қўйган, шунингдек, «Яшил зона»га олиб борувчи барча йўллар хавфсизлик кучлари томонидан ёпилгани ҳам хабар қилинган.

Ироқ ҳукумати биноси дарвозалари олдида намойишчилар ва ироқлик кучлар ўртасида кичик тўқнашувлар бўлгани хабар қилинган. Гувоҳларнинг сўзларига кўра, «Яшил зона» устида Америка вертолёти айланиб юрганини ҳам кўриш мумкин.

Ироқда парламент сайловлари 10 октябрь, якшанба куни мамлакатда узоқ вақтдан бери давом этаётган сиёсий ва иқтисодий инқироз фонида бўлиб ўтганди. Овоз бериш натижалари комиссиянинг расмий веб-сайтларида эълон қилинади ва уларга бемалол кириш мумкин. Олий сайлов комиссияси раҳбари Аднан Жалил сайлов натижалари тасдиқланмагунча норасмий бўлиб қолишини эслатган.

Эслатиб ўтамиз, 7 ноябрга ўтар кечаси Бағдоднинг «Яшил зонаси»да портловчи модда ўрнатилган дрон ёрдамида мамлакат бош вазири Мустафо ал-Казимий қароргоҳига ҳужум уюштирилган эди. Ҳодисада бош вазирнинг шахсий хавфсизлик хизмати ходимларидан олти киши жароҳатланган. Ал-Казимийнинг ўзи Twitter’да жароҳат олмагани ҳақида ёзган ҳамда барчани хотиржамлик ва вазминликка чақирган.

АҚШ президенти Жо Байден Ироқдаги терактни қоралаган. У ал-Казимийнинг қароргоҳига қилинган ҳужум бўйича текширувга ёрдам кўрсатиш бўйича топшириқ берган.