Ўзбек футболида 2021 йилги мавсум расман якунланди. 25 декабрь куни Тошкентдаги Renaissance Hall залида Ўзбекистон футбол ассоциациясининг (ЎФА) навбатдан ташқари Конгресси ҳамда UZ Football Awards—2021 тақдирлаш маросими бўлиб ўтди. Маросимнинг асосий воқеалари «Дарё» фоторепортажида.

Тақдирлаш маросимидан аввал ЎФАнинг навбатдан ташқари Конгресси бўлиб ўтди. Унда Одил Аҳмедов вице-президент этиб сайланган бўлса, Рустам Шоабдураҳмонов, Аваз Каримов, Меҳриддин Абдуллаев, Козимжон Комилов ва Алишер Хўжаев ЎФА Ижроқўм аъзолигига сайланди.

Конгрессдан сўнг, тақдирлаш маросими бошланиши олдидан «чироқлар шоуси» намойиш этилди.

Маросимда дастлаб «Ўзбек футболи нуронийси» соврини ўзбек спорт шарҳловчилигининг асосчиси — Ахбор Имомхўжаевга топширилди. Совринни унинг ўғли Аброр Имомхўжаев қабул қилиб олди.

«Фидойилик рамзи» мукофоти 77 ёшли Садри бобога топширилди. Садри Бобо Самарқанд вилоятидаги «Динамо» стадиони майсасини 60 йилдан буён парвариш қилиб келади.

Учинчи бўлиб топширилган «Жасорат» соврини — Ўзбекистон кар-соқовлар терма жамоасига тақдим этилди. Маросимда терма жамоанинг Эрон мезбонлик қилган Сурдлипия ўйинларининг Осиё ва Тинч океани минтақаси саралашида иштирок этиб, фахрли 3-ўринни эгаллагани ва келаси йил Бразилия мезбонлик қиладиган ёзги Сурдлимпия ўйинларига чиптани қўлга киритгани айтиб ўтилди.

Шунингдек, маросимда яна бир қатор номинациялар бўйича йилнинг энг яхшилари аниқланди.

Энг яхши футбол журналисти — Фахриддин Рўзиев;

Энг яхши ҳудудий ассоциация — Қорақалпоғистон ФА;

Мухлислар меҳри — «Андижон» фан-клуби;

Йилнинг энг яхши футзал мураббийи — Баҳодир Аҳмедов (Ўзбекистон футзал терма жамоаси ва «Ҳуахин-Жиззах» клубининг бош мураббийи);

Йилнинг энг яхши футзалчиси — Дилшод Раҳматов (Ўзбекистон футзал терма жамоаси ва «Ҳуахин-Жиззах» клубининг футзалчиси);

Аёллар Олий лигасининг тўпурари — Диёра Ҳабибуллаева («Сўғдиёна-W»);

Аёллар Олий лигасининг энг яхши мураббийи — Шерали Бобоқулов («Сўғдиёна-W»);

Аёллар Олий лигасининг энг яхши футболчиси — Диёра Ҳабибуллаева («Сўғдиёна-W»);

Про-Лиганинг энг яхши футболчиси — Марко Обрадович («Нефтчи»);

Миннатдорчилик рамзи — Про-Лига трансляциялари учун Узрепорт ТВ ва Футбол ТВ телеканаллари бош директори Равшанхон Жўраевга миннатдорчилик соврини топширилди.

Шундан сўнг саҳнага Ўзбекистон халқ артисти Фаррух Зокиров таклиф этилди. У йиғилганларни қўшиқ билан сийлади.

Йилнинг энг яхши ҳаками — Илгиз Танташев;

Миннатдорчилик рамзи — Суперлига ва Ўзбекистон Кубоги трансляциялари учун Ўзбекистон миллий телерадиокомпанияси раҳбари Алишер Хўжаевга миннатдорчилик соврини топширилди;

Суперлиганинг энг чиройли голи — Билолхон Тошмирзаев («Локомотив» — «Турон» учрашувида киритган голи);

Миннатдорчилик рамзи – мавсум давомидаги ҳамкорлик учун Coca-Cola компанияси раҳбари Эзел Агаоглуга ҳамда Apex Инсурансе компанияси директори ўринбосари Рустам Муҳаммедовга миннатдорчилик соврини топширилди;

Суперлига—2021 тўпурари — Драган Черан («Пахтакор») — 16 та гол;

Суперлиганинг энг яхши мураббийи — Питер Ҳюистра («Пахтакор»);

Суперлиганинг энг яхши футболчиси — Ҳусайн Норчаев («Насаф»);

Энг яхши ёшлар мураббийи — Аъзам Шерғозиев («ОКМК U-21»);

Ёш юлдуз — Ҳусайн Норчаев («Насаф»);

Йилнинг энг яхши аёллар мураббийи — Илҳом Ҳанжариев («ОКМК-W»);

Йилнинг энг яхши аёл футболчиси — Дилдора Нозимова («Бунёдкор-W»).

Бундан сўнг саҳнага Нилуфар Усмонова таклиф этилди ва у ҳам йиғилганларни қўшиқлари билан сийлади.

Ўзбекистоннинг энг яхши мураббийи — Рўзиқул Бердиев («Насаф»);

Суперлига—2021 рамзий терма жамоаси:

Ўзбекистоннинг энг яхши футболчиси — Элдор Шомуродов («Рома»).

Шундай қилиб Ўзбекистонда 2021 йилги мавсум якунларига бағишланган маросим ўз ниҳоясига етди.

Оғабек Самисов ва Мадина Нурман тайёрлади