O‘FA vitse-prezidentiga aylangan Odil Ahmedov, Eldor Shomurodov yana tengsiz. O‘zbek futbolida 2021-yilning eng yaxshilari aniqlangan marosimdan fotoreportaj

O‘zbek futbolida 2021-yilgi mavsum rasman yakunlandi. 25-dekabr kuni Toshkentdagi Renaissance Hall zalida O‘zbekiston futbol assotsiatsiyasining (O‘FA) navbatdan tashqari Kongressi hamda UZ Football Awards—2021 taqdirlash marosimi bo‘lib o‘tdi. Marosimning asosiy voqealari “Daryo” fotoreportajida.

Taqdirlash marosimidan avval O‘FAning navbatdan tashqari Kongressi bo‘lib o‘tdi. Unda Odil Ahmedov vitse-prezident etib saylangan bo‘lsa, Rustam Shoabdurahmonov, Avaz Karimov, Mehriddin Abdullayev, Kozimjon Komilov va Alisher Xo‘jayev O‘FA Ijroqo‘m a’zoligiga saylandi.

Kongressdan so‘ng, taqdirlash marosimi boshlanishi oldidan “chiroqlar shousi” namoyish etildi.

Marosimda dastlab “O‘zbek futboli nuroniysi” sovrini o‘zbek sport sharhlovchiligining asoschisi — Axbor Imomxo‘jayevga topshirildi. Sovrinni uning o‘g‘li Abror Imomxo‘jayev qabul qilib oldi.

“Fidoyilik ramzi” mukofoti 77 yoshli Sadri boboga topshirildi. Sadri Bobo Samarqand viloyatidagi “Dinamo” stadioni maysasini 60 yildan buyon parvarish qilib keladi.

Uchinchi bo‘lib topshirilgan “Jasorat” sovrini — O‘zbekiston kar-soqovlar terma jamoasiga taqdim etildi. Marosimda terma jamoaning Eron mezbonlik qilgan Surdlipiya o‘yinlarining Osiyo va Tinch okeani mintaqasi saralashida ishtirok etib, faxrli 3-o‘rinni egallagani va kelasi yil Braziliya mezbonlik qiladigan yozgi Surdlimpiya o‘yinlariga chiptani qo‘lga kiritgani aytib o‘tildi.

Shuningdek, marosimda yana bir qator nominatsiyalar bo‘yicha yilning eng yaxshilari aniqlandi.

Eng yaxshi futbol jurnalisti — Faxriddin Ro‘ziyev;

Eng yaxshi hududiy assotsiatsiya — Qoraqalpog‘iston FA;

Muxlislar mehri — “Andijon” fan-klubi;

Yilning eng yaxshi futzal murabbiyi — Bahodir Ahmedov (O‘zbekiston futzal terma jamoasi va “Huaxin-Jizzax” klubining bosh murabbiyi);

Yilning eng yaxshi futzalchisi — Dilshod Rahmatov (O‘zbekiston futzal terma jamoasi va “Huaxin-Jizzax” klubining futzalchisi);

Ayollar Oliy ligasining to‘purari — Diyora Habibullayeva (“So‘g‘diyona-W”);

Ayollar Oliy ligasining eng yaxshi murabbiyi — Sherali Boboqulov (“So‘g‘diyona-W”);

Ayollar Oliy ligasining eng yaxshi futbolchisi — Diyora Habibullayeva (“So‘g‘diyona-W”);

Pro-Liganing eng yaxshi futbolchisi — Marko Obradovich (“Neftchi”);

Minnatdorchilik ramzi — Pro-Liga translyatsiyalari uchun Uzreport TV va Futbol TV telekanallari bosh direktori Ravshanxon Jo‘rayevga minnatdorchilik sovrini topshirildi.

Shundan so‘ng sahnaga O‘zbekiston xalq artisti Farrux Zokirov taklif etildi. U yig‘ilganlarni qo‘shiq bilan siyladi.

Yilning eng yaxshi hakami — Ilgiz Tantashev;

Minnatdorchilik ramzi — Superliga va O‘zbekiston Kubogi translyatsiyalari uchun O‘zbekiston milliy teleradiokompaniyasi rahbari Alisher Xo‘jayevga minnatdorchilik sovrini topshirildi;

Superliganing eng chiroyli goli — Bilolxon Toshmirzayev (“Lokomotiv” — “Turon” uchrashuvida kiritgan goli);

Minnatdorchilik ramzi – mavsum davomidagi hamkorlik uchun Coca-Cola kompaniyasi rahbari Ezel Agaogluga hamda Apex Insuranse kompaniyasi direktori o‘rinbosari Rustam Muhammedovga minnatdorchilik sovrini topshirildi;

Superliga—2021 to‘purari — Dragan Cheran (“Paxtakor”) — 16 ta gol;

Superliganing eng yaxshi murabbiyi — Piter Hyuistra (“Paxtakor”);

Superliganing eng yaxshi futbolchisi — Husayn Norchayev (“Nasaf”);

Eng yaxshi yoshlar murabbiyi — A’zam Sherg‘oziyev (“OKMK U-21”);

Yosh yulduz — Husayn Norchayev (“Nasaf”);

Yilning eng yaxshi ayollar murabbiyi — Ilhom Hanjariyev (“OKMK-W”);

Yilning eng yaxshi ayol futbolchisi — Dildora Nozimova (“Bunyodkor-W”).

Bundan so‘ng sahnaga Nilufar Usmonova taklif etildi va u ham yig‘ilganlarni qo‘shiqlari bilan siyladi.

O‘zbekistonning eng yaxshi murabbiyi — Ro‘ziqul Berdiyev (“Nasaf”);

Superliga—2021 ramziy terma jamoasi:

O‘zbekistonning eng yaxshi futbolchisi — Eldor Shomurodov (“Roma”).

Shunday qilib O‘zbekistonda 2021-yilgi mavsum yakunlariga bag‘ishlangan marosim o‘z nihoyasiga yetdi.

Og‘abek Samisov va Madina Nurman tayyorladi