Ургутда олиб қочилган Damas ЙТҲга учради, Самарқандда Lada ёниб кетди. ЙТҲлар тафсилотлари

Ўзбекистон йўлларида содир бўлган ҳодисалар ҳақида маълумот берамиз.

Самарқандда Lada ёниб кетди

2021 йилнинг 23 декабрь куни соат 18:10 ларда, Самарқанд шаҳри, Спитамен шоҳкўчасида, ҳайдовчи О.Н. «Lada-2115» автомобилида ҳаракатланиб кетаётган вақтда транспорт воситасининг двигатель қисмида қисқа туташув ва унинг ортидан ёнғин юзага келган.

Ёнғин ўт ўчирувчилар томонидан бартараф этилган. Тан жароҳати олган фуқаролар йўқ.

Ушбу ҳодиса юзасидан Самарқанд шаҳар ФВБ ва ЙҲХБ ходимлари томонидан суриштирув олиб борилмоқда.

Ургутда олиб қочилган Damas ЙТҲга учради.

2021 йил 17 декабрь куни Ургут тумани ИИБга фуқаро Э.И. ариза билан мурожаат қилиб, 16 декабрь куни ўзига тегишли, оқ рангли Damas автомашинасини кўчада қаровсиз қолдирганини, ушбу машина номаълум шахс томонидан олиб қочилиб, «Чорчинор» маҳалласида йўл-транспорт ҳодисасига учраб, ҳодиса содир бўлган жойга ташлаб кетилганини, транспортни олиб қочган номаълум шахсни аниқлаб, унга нисбатан қонуний чора кўришни сўраган.

Жиноят иши бўйича ҳодиса содир бўлган жойни кўздан кечириш давомида, Damas’дан олинган қўл бармоқ излари кимга тегишли эканини аниқлаш мақсадида, Самарқанд вилояти ИИБ Эксперт криминалистика бўлимига судга-оид дактилоскопик экспертиза тайинланган. Экспертиза хулосасига кўра, мазкур қўл бармоқ излари Ургут туманида яшовчи Б.Ҳ.га (2000 йилда туғилган) тегишли экани аниқланиб, ушбу шахс вилоят ҳамда туман ИИБ ЖҚБ ходимлари томонидан олиб борилган тезкор-қидирув тадбирлари натижасида ушланган.

Мазкур ҳолат юзасидан Ургут тумани ҳузуридаги Тергов бўлими томонидан Жиноят кодексининг 267-моддаси 1-қисми (транспорт олиб қочиш) билан жиноят иши қўзғатилиб, тергов ҳаракатлари олиб борилмоқда.

Тошкентда Matiz ва Spark тўқнашуви оқибатида икки ҳайдовчи жароҳат олди.

2021 йил 23 декабрь куни тахминан соат 06:30 да Шайхонтоҳур тумани кичик ҳалқа автомобиль йўли ва Алоқа кўчаси кесишмасида иккита транспорт воситаси – К.Т. (1996 йилда туғилган) бошқарувидаги Matiz автомобили ва Х.К. (1968 йилда туғилган) бошқарувидаги Spark автомобили ўртасида тўқнашув юз берди.

ЙТҲ оқибатида иккала ҳайдовчилар бадан шикастлари билан шифохонага етказилди. Мазкур факт бўйича терговолди текшируви ўтказилмоқда.

Янгийўлда Damas пиёдани уриб кетди.

2021 йилнинг 14 октябрь куни соат 07:25 ларда, Тошкент вилояти, Янгийўл тумани ҳудудидан ўтувчи М-39 автомобиль йўлининг 832-километрида ҳайдовчи, Ў.Д. (1991 йилда туғилган) Damas атвомобилини бошқараётиб, тартибга солинмаган пиёдалар ўтиш жойидан йўлни кесиб ўтаётган пиёда Ф.А.ни (1995 йилда туғилган) уриб юборган.

Оқибатда пиёда Ф.А. тан жароҳатлар билан шифохонага ётқизилган.

Мазкур ЙТҲ юзасидан Янгийўл тумани ИИБ ҳузуридаги ТБ ходимлари томонидан Жиноят кодексининг 266-моддаси 1-қисми (транспорт бошқариш хавфсизлиги қоидаларини бузиш) билан жиноят иши қўзғатилиб, тўпланган ҳужжатлар жиноят ишлари бўйича туман судига юборилган.