Давлат хизматлари марказида ногиронлиги бўлган шахсларга мос келувчи лавозимларда ишлаши учун қулай шароитлар яратилади, деб хабар бермоқда Telegram’даги «Ҳуқуқий ахборот» канали.

Қайд этилишича, президент «Ногиронлиги бўлган шахсларни ҳар томонлама қўллаб-қувватлаш, уларнинг бандлигига кўмаклашиш ҳамда ижтимоий фаоллигини янада оширишга оид қўшимча чора-тадбирлар тўғрисида»ги қарорни имзолади. Унга кўра, 2022 йил 1 мартгача ҳар бир ҳудудда биттадан ДХМда ногиронларнинг уларга мос келувчи лавозимларда (оператор, консултант, инспектор ва бошқалар) ишлаши учун қулай шароитлар яратилади.

2022 йил 1 сентябргача мазкур амалиёт барча ДХМда жорий қилинади. 2022 йил 1 июлдан Бандликка кўмаклашиш давлат жамғармаси маблағлари ҳисобидан ногиронларни қўллаб-қувватловчи нодавлат таълим ташкилотларига БҲМнинг 200 баравари миқдорида ижтимоий буюртма маблағлари ажратилади. Келаси йилдан ногиронларни касб-ҳунарга ўқитиш бўйича грант миқдори камида 2 бараварга оширилади.

Ногиронлар ҳаётини яхшилашга қаратилган энг яхши ижтимоий лойиҳаларни рағбатлантириб бориш мақсадида 2022 йилдан қуйидаги номинациялар бўйича республика танловлари ташкил этилади:

• Иқтисодий тараққиёт ва камбағалликни қисқартириш вазирлиги томонидан — «Энг яхши ижтимоий лойиҳа»;
• Савдо-саноат палатаси томонидан — «Энг яхши тадбиркор»;
• Олий ва ўрта махсус таълим вазирлиги томонидан — «Энг яхши талаба»;
• Туризм ва спорт вазирлиги томонидан — «Энг яхши спортчи»;
• Маданият вазирлиги томонидан — «Энг яхши китобхон»;
• Бандлик ва меҳнат муносабатлари вазирлиги томонидан — «Энг яхши иш берувчи».

Танлов натижалари ҳар йили 3 декабрь — Халқаро ногиронлар куни арафасида эълон қилинади ҳамда ғолибларга БҲМнинг 100 баравари миқдорида пул мукофоти берилади.

Аввалроқ Ўзбекистонда ҳар йили 500 нафаргача ногиронлиги бўлган ёшларга субсидия ажратилиши хабар қилинганди. Шунингдек, Ўзбекистонда болаларга ногиронликни педиатрия тиббий-ижтимоий эксперт комиссиялари белгилайдиган бўлгани маълум қилинган.