Янги йил байрами арафасида йўловчиларга қулайлик яратиш мақсадида 2021 йил 27 декабрдан 2022 йил 9 январгача Тошкент—Бухоро—Тошкент йўналишида 770/769-сонли «Афросиёб» поездларининг қатновини йўлга қўйилади. Бу ҳақда «Ўзбекистон темир йўллари» хабар берди.
Маълум қилинишича, 770-сонли «Афросиёб» фақат ҳафтанинг жума, шанба ва якшанба кунлари соат 09:02 да Тошкент марказий темир йўл вокзалидан ҳаракатини амалга ошириб келаётган эди. Энди поезд 27 декабрдан 9 январгача ҳар куни соат 09:02 да Тошкент—Бухоро йўналишида қатновини амалга оширади.
Шунингдек, 769-сонли «Афросиёб» поезди ҳам 27 декабрдан 9 январгача ҳар куни соат 15:02 да Бухоро—Тошкент йўналишида қатновини амалга оширади.
Поездлар Самарқанд, Навоий темир йўл вокзалларида ҳам тўхтаб ўтади.
Бундан ташқари, байрам кунлари барча йўловчи поездларга қўшимча вагонлар ҳам уланади.
Изоҳ (0)