Urgutda olib qochilgan Damas YTHga uchradi, Samarqandda Lada yonib ketdi. YTHlar tafsilotlari

O‘zbekiston yo‘llarida sodir bo‘lgan hodisalar haqida ma’lumot beramiz.

Samarqandda Lada yonib ketdi

2021-yilning 23-dekabr kuni soat 18:10 larda, Samarqand shahri, Spitamen shohko‘chasida, haydovchi O.N. “Lada-2115” avtomobilida harakatlanib ketayotgan vaqtda transport vositasining dvigatel qismida qisqa tutashuv va uning ortidan yong‘in yuzaga kelgan.

Yong‘in o‘t o‘chiruvchilar tomonidan bartaraf etilgan. Tan jarohati olgan fuqarolar yo‘q.

Ushbu hodisa yuzasidan Samarqand shahar FVB va YHXB xodimlari tomonidan surishtiruv olib borilmoqda.

Urgutda olib qochilgan Damas YTHga uchradi.

2021-yil 17-dekabr kuni Urgut tumani IIBga fuqaro E.I. ariza bilan murojaat qilib, 16-dekabr kuni o‘ziga tegishli, oq rangli Damas avtomashinasini ko‘chada qarovsiz qoldirganini, ushbu mashina noma’lum shaxs tomonidan olib qochilib, “Chorchinor” mahallasida yo‘l-transport hodisasiga uchrab, hodisa sodir bo‘lgan joyga tashlab ketilganini, transportni olib qochgan noma’lum shaxsni aniqlab, unga nisbatan qonuniy chora ko‘rishni so‘ragan.

Jinoyat ishi bo‘yicha hodisa sodir bo‘lgan joyni ko‘zdan kechirish davomida, Damas’dan olingan qo‘l barmoq izlari kimga tegishli ekanini aniqlash maqsadida, Samarqand viloyati IIB Ekspert kriminalistika bo‘limiga sudga-oid daktiloskopik ekspertiza tayinlangan. Ekspertiza xulosasiga ko‘ra, mazkur qo‘l barmoq izlari Urgut tumanida yashovchi B.H.ga (2000-yilda tug‘ilgan) tegishli ekani aniqlanib, ushbu shaxs viloyat hamda tuman IIB JQB xodimlari tomonidan olib borilgan tezkor-qidiruv tadbirlari natijasida ushlangan.

Mazkur holat yuzasidan Urgut tumani huzuridagi Tergov bo‘limi tomonidan Jinoyat kodeksining 267-moddasi 1-qismi (transport olib qochish) bilan jinoyat ishi qo‘zg‘atilib, tergov harakatlari olib borilmoqda.

Toshkentda Matiz va Spark to‘qnashuvi oqibatida ikki haydovchi jarohat oldi.

2021-yil 23-dekabr kuni taxminan soat 06:30 da Shayxontohur tumani kichik halqa avtomobil yo‘li va Aloqa ko‘chasi kesishmasida ikkita transport vositasi – K.T. (1996-yilda tug‘ilgan) boshqaruvidagi Matiz avtomobili va X.K. (1968-yilda tug‘ilgan) boshqaruvidagi Spark avtomobili o‘rtasida to‘qnashuv yuz berdi.

YTH oqibatida ikkala haydovchilar badan shikastlari bilan shifoxonaga yetkazildi. Mazkur fakt bo‘yicha tergovoldi tekshiruvi o‘tkazilmoqda.

Yangiyo‘lda Damas piyodani urib ketdi.

2021-yilning 14-oktabr kuni soat 07:25 larda, Toshkent viloyati, Yangiyo‘l tumani hududidan o‘tuvchi M-39 avtomobil yo‘lining 832-kilometrida haydovchi, O‘.D. (1991-yilda tug‘ilgan) Damas atvomobilini boshqarayotib, tartibga solinmagan piyodalar o‘tish joyidan yo‘lni kesib o‘tayotgan piyoda F.A.ni (1995-yilda tug‘ilgan) urib yuborgan.

Oqibatda piyoda F.A. tan jarohatlar bilan shifoxonaga yotqizilgan.

Mazkur YTH yuzasidan Yangiyo‘l tumani IIB huzuridagi TB xodimlari tomonidan Jinoyat kodeksining 266-moddasi 1-qismi (transport boshqarish xavfsizligi qoidalarini buzish) bilan jinoyat ishi qo‘zg‘atilib, to‘plangan hujjatlar jinoyat ishlari bo‘yicha tuman sudiga yuborilgan.