Ўзбекистон 23 декабрь куни Афғонистонга навбатдаги инсонпарварлик ёрдамини юборгани хабар қилинганди. Шу куннинг ўзидаёқ инсонпарварлик ёрдамини топшириш маросими бўлиб ўтди.
АОКАнинг Сурхондарё вилояти ҳудудий бошқармасининг хабар қилишича, тадбирда иштирок этувчи Ўзбекистон президентининг Афғонистон бўйича махсус вакили Исматулла Иргашев ва Сурхондарё вилояти ҳокими Тўра Боболов бошчилигидаги мамлакат расмийларини Ҳайратон шаҳрида Балх вилояти губернатори Қудратилло Абу Ҳамза ва провинциянинг бошқа бошқарув идоралари вакиллари кутиб олган. Ўзбекистон делегацияси автомашиналарда шаҳар орқали вилоят маркази Мозори Шариф шаҳрига йўл олган.
Ташқи ишлар вазирлиги инсонпарварлик ёрдамини топшириш маросими тўғрисида маълумот берди. Унда айтилишича, ёрдам карвонидан ун, гуруч, шакар ва бошқа озиқ-овқатлар, биринчи навбатдаги зарурий товарлар, кийим-кечаклар, тўқимачилик маҳсулотлари, умумий оғирлиги 4 минг тоннадан зиёд кўмир ўрин олган.
Маросимда сўзга чиққан Афғонистон Муваққат ҳукумати ташқи ишлар вазири ўринбосари Шер Аббос Станакзай мамлакат учун оғир дамларда кўрсатилаётган доимий эътибор, қўллаб-қувватлаш ва бирдамлик учун Шавкат Мирзиёевга бутун афғон халқи номидан чуқур миннатдорлик билдирган.
Аббос Станакзай афғон халқи Ўзбекистон раҳбарининг биродарлик муносабатини доимо ҳис қилиб келганини, шу боис мамлакатнинг янги ҳокимият идоралари яхши қўшничилик муносабатларини янада мустаҳкамлаш учун барча имкониятларни ишга солишини билдирган. Унинг айтишича, Афғонистон ҳудудидан қўшни давлатларга, жумладан, Ўзбекистонга ҳеч қандай таҳдидларга йўл қўйилмайди.
Мавзуга доир:
Афғонистон жамоатчилиги вакиллари сўзга чиқиб, бу ёрдам мамлакатда оммавий очарчилик, оғир гуманитар ва озиқ-овқат инқирозининг олдини олишга хизмат қилади.
Тадбир давомида ўзбекистонлик ошпазлар томонидан ўзбек палови пиширилиб, барча йиғилганлар, шунингдек, Афғонистон жамоатчилигининг кўплаб вакилларига тортиқ қилинган.
Эслатиб ўтамиз, Ўзбекистон Афғонистонга инсонпарварлик ёрдамини илк бор 14 сентябрь куни юборган. Ун, турли озиқ-овқат маҳсулотлари, бирламчи зарур товарлар, дори-дармонлар, кийим-кечак ва пойабзаллардан иборат 1300 тонна оғирликдаги ёрдам бутун мамлакат бўйлаб кам таъминланган афғон оилаларига тарқатилган.
Мавзуга доир:
- «Афғонистонни яккалаб, уни муаммолар гирдобига ташлаб қўйиш мумкин эмас» — Шавкат Мирзиёев БМТ Бош Ассамблеясида Афғонистон муаммоси ҳақида гапирди
- Шавкат Мирзиёев: «Афғон халқига зарур инсонпарварлик ёрдамини кўрсатишни давом эттиришга тайёрмиз»
- Шавкат Мирзиёев: «Энг катта муаммо — Афғонистон шу қишни эсон-омон, очарчиликка дуч келмай, урушларсиз ўтказиб олиши»
Изоҳ (0)