«Бири коррупцияга йўл очади, бошқаси дарров ғўддайиб, оёғи ердан узилади». Шавкат Мирзиёев Тошкент вилоятининг собиқ ҳокимлари ҳақида

Олмалиқ шаҳрида фаоллар билан бўлган учрашувда Шавкат Мирзиёев Тошкент вилоятидаги кадрлар муаммоси ҳақида гапирди.

«Мен нима учун ҳоким ёрдамчилари деган тизимни жорий қилдим, чунки ўзим учун яхши кадрлар қидириб юрибман. Мана, бугун ҳам сизлар билан суҳбатда янги кадрлар кашф қилдим.

Мисол учун, Андижон вилоятида 30 йилда ҳокимлар сони кўп бўлмаган. Лекин Тошкент вилоятига, мажозий маънода айтганда, 30 та ҳоким келиб-кетди. Нега? Чунки ишни эплайдиган яхши кадрлар топиш қийин. Бири коррупцияга йўл очади, бошқаси дарров ғўддайиб, оёғи ердан узилади. Мен амални бераман, лекин арқонни узун ташлаб қўяман.

Зоир Мирзаевни бекорга олиб келмадим бу ерга. Қашқадарё ҳам оғир вилоятлардан бири эди, аммо эплади. Тошкент вилоятида муаммолар кўплиги учун уни атайин бу ерга олиб келдим», — деди Шавкат Мирзиёев.

Маълумот учун, Тошкент вилояти ҳокими 2021 йилнинг 18 ноябрь куни 16 марта ўзгарди (Ўзбекистоннинг бошқа ҳеч бир ҳудудида ҳокимлар бу қадар кўп ўзгармаган) — вилоятнинг Чирчиқ шаҳрига ҳоким қилиб юборилган Даврон Ҳидоятов ўрнини икки йил Қашқадарёга ҳокимлик қилган Зоир Мирзаев эгаллади.

Даврон Ҳидоятов Тошкент вилоятини бир йил ҳам бошқармаган ҳокимлар сафини тўлдирди. У 9 ой 19 кун ҳокимлик қилди — бу борада унинг кўрсаткичи Шукрулло Бобоевникидан ҳам ёмон (у ҳам 2016—2017 йилларда 10 ой 15 кун ҳокимлик қилган), лекин Содиқ Абдуллаев (6 ой 8 кун) ва Исломжон Эргашхўжаевникидан (4 ой 3 кун) яхшироқ. Қайд этиш жоиз, Тошкент вилояти ҳокими 2016 йил августидан бери олти марта ўзгарди.