Қашқадарё вилояти Яккабоғ туманида бодом гуллади. Яккабоғлик блогер Камил Фахрутдинов гуллаган дарахтнинг 22 декабрь куни олинган суратларини тақдим этди.
Гидрометеорология хизмати маркази метеорологи Эркин Абдулаҳатов ўзининг Telegram каналида ёзишича, сўнгги икки-уч кунликда республиканинг катта қисмида апрель ойининг ўрталарига хос илиқ, баҳорий ҳаво кузатилмоқда. Жануб вилоятларда ҳарорат максимум 20 даражага кўтарилди.
«Бу эса юқоридаги каби эртапишар бодом дарахтида гуллаш ҳолатларини келтириб чиқарган кўринади. Бу, табийки оммавий гуллаш эмас, аммо бунақа иссиқ кунлар яна 2-3 кун давомий кузатилса, жануб ва воҳа ҳудудларида бодом дарахтларида гуллаш ҳодисалари кузатилиши ҳам бор гап. Бу келаси йил ҳосили учун ёмон», — деб қайд этган метеоролог.
«Ўзгидромет» маълумотларига кўра, 23 декабрь куни Қашқадарё вилоятида ҳаво ўзгариб туради, кечаси ва эрталаб баъзи жойларда бироз ёмғир ёғади. Ҳарорат кечаси 3-8 даража илиқ, кундузи 13-18 даража илиқ бўлади.
Эслатиб ўтамиз, 2021 йилнинг январида Ўзбекистонга Эрондан жуда илиқ ҳаво массалари кириб келгани сабабли Қашқадарёнинг бир неча туманида бойчечак гуллаганди.
Мавзуга доир: Видео: Қашқадарёдаги чанг бўрони
Изоҳ (0)