Бердимуҳамедов савдо ва ташқи иқтисодий алоқаларга масъул амалдорларни сўнгги бор огоҳлантириб, қаттиқ танбеҳ берди

Туркманистон президенти Гурбангули Бердимуҳамедов 20 декабрь куни ишчи йиғилиш ўтказди, унда савдо мажмуаси раҳбарлари галма-галдан ҳисобот берди, деб ёзмоқда «Хроника Туркменистана».

Йиғилишда бош вазирнинг савдо масалалари бўйича ўринбосари Чори Қиличов, Савдо ва ташқи иқтисодий алоқалар вазири Оразмурод Гурбанназаров Янги йил байрами арафасида бозорларни озиқ-овқат маҳсулотлари билан таъминлаш тўғрисида ҳисобот ўқиди.

Саноатчилар ва тадбиркорлар уюшмаси раиси Довран Худайбердиевнинг айтишича, тадбиркорлар томонидан зарур маҳсулотлар ишлаб чиқаришни кўпайтириш борасидаги ишлар изчил давом эттирилмоқда.

Ҳисоботлардан сўнг Бердимуҳамедов бош вазир ўринбосарларини танқид қилди.

«Маҳсулот ассортиментини кенгайтиришга қаратилган тадбирларни, шунингдек, айрим ташкилий ишларни амалга оширишда қоидабузарликларга йўл қўйилмоқда» — деди Гурбангули Бердимуҳамедов. Сўнг у Қиличов ва Гурбанназаровга «ўз хизмат вазифаларини зарур даражада бажармагани, тасарруфидаги муассасалар фаолияти устидан назоратни сусайтиргани» учун сўнгги огоҳлантириш билан қаттиқ танбеҳ берди.

Бош вазир ўринбосари Қиличов шу йилнинг 8 октябрида ҳамда 2020 йилнинг 21 августида «сўнгги огоҳлантириш билан» шундай танбеҳлар олганди.

Бердимуҳамедов мутасаддиларга талабни ўрганиш, савдо маданияти, хизмат кўрсатиш сифатини ошириш ва рақамли тизимни жорий этиш бўйича топшириқлар берди. Президент, шунингдек, Янги йил байрами арафасида бозорлар ва савдо марказларини маҳсулотлар билан тўлиқ таъминлаш, маҳаллий маҳсулотларни экспорт қилиш ҳажмини ошириш юзасидан ҳам тегишли топшириқлар берди.

Туркманистон президенти 17 декабрь кунги Вазирлар Маҳкамаси йиғилишида бош вазир ўринбосарларининг барчасига Янги йил байрами арафасида дўкон ва бозорларни айланиб чиқишни, товарлар нархлари билан яқиндан танишишни буюрганди.

Гурбангули Бердимуҳамедов байрамлар олдидан Туркманистон бозорларида маҳсулот мўл-кўллигини таъминлаш бўйича мунтазам топшириқлар бериб келмоқда. Натижада Ашхобод бозорларида маҳсулотлар (Бетарафлик кунида гўшт ва қандолат маҳсулотлари) арзонлашди. Бироқ кўпинча бу маҳсулотларнинг сифати паст бўлади ва ҳамманинг талабини қондирмайди. Байрамлардан кейин маҳсулотлар яна тугайди ёки уларнинг нархи аввалги даражага кўтарилади, дея қайд этган «Хроника Туркменистана».