Беларусда Nexta мухолифатчи Telegram каналининг собиқ бош муҳаррири Роман Протасевич билан ҳибсга олинган россиялик Софя Сапега Беларусь президентидан афв сўради. Бу ҳақда Сапеганинг ўгай отаси Сергей Дудич «Эхо Москви» радиостанциясига маълум қилди.
«Ҳар қандай қарор суддан кейингина қабул қилиниши мумкин. Лекин барибир президентнинг афв этишидан умидвормиз. Софьянинг Беларусь Республикаси президенти номига афв этишни сўраб ариза ёзганидан хабарим бор. Буёғига нима бўлишини кутайликчи», — деди Дудич.
У Сапега ҳибсга олинганидан кейин қариндошлари Россия Федерацияси президенти маъмуриятига мурожаат қилганини эслатди. «Ташқи ишлар вазирлигидан бизнинг ишимиз ва Софьянинг тақдири назорат остида экани, россиялик дипломатлар вазият ва тергов жараёнини кузатиб бораётгани ҳақида жавоб олдик. Қўлимиздан келганини қиляпмиз, ҳамма эшикларни тақиллатиб чиқдик», — деди Сапеганинг ўгай отаси.
Россия президенти матбуот котиби Дмитрий Песков 21 декабрь куни журналистларнинг Беларусда ҳибсга олинган россияликлар ҳақидаги саволига жавоб берар экан, шундай деди: «Фуқароларимиз манфаатларини ҳимоя қилиш учун барча имкониятлар ишга солинмоқда». Унинг қўшимча қилишича, Россия ва Беларусь ҳукуматлари бу масала бўйича «доимий мулоқотда».
Эслатиб ўтамиз, 23 май куни Беларусь ҳукумати Ryanair авиакомпаниясининг Афинадан Вильнюсга учаётган самолётини шошилинч равишда Минскка қўнишга мажбур қилганди. Самолёт йўловчилари орасида Роман Протасевич ва унинг севгилиси Софя Сапега ҳам бор эди. Улар аэропортда қўлга олинган.
Беларусь ҳукумати Роман Протасевичга мамлакат Жиноят кодексининг учта моддаси бўйича: 130 (ижтимоий адоват ва келишмовчиликни қўзғатиш), 293 (оммавий тартибсизликларни уюштириш) ва 342 (жамоат тартибини қўпол равишда бузадиган ҳаракатларни уюштириш) билан айбламоқда.
Декабрь ойида Беларусь Тергов қўмитаси россиялик Софя Сапегага нисбатан ижтимоий нафрат ва нифоқни қўзғатиш моддаси бўйича якуний айблов эълон қилди. BBC рус хизматининг ёзишича, Сапега олти йиллик қамоқ жазосига маҳкум этилиши мумкин — бу тергов билан суд олди келишувини ҳисобга олган ҳолда мазкур модда бўйича энг кам муддат. Дудичнинг айтишича Сапега «тергов билан келишув, Россиянинг ёрдам бериши ва экстрадицияга, иш умуман судгача бормаслигига умид қилаётганди».
Изоҳ (0)