Украина собиқ президенти Пётр Порошенко давлатга хиёнатда гумонланмоқда

Украина Давлат тергов бюроси мамлакатнинг бешинчи президенти, «Европа бирдамлиги» партияси етакчиси Пётр Порошенкога унинг давлатга хиёнат қилиш, террорчилик ташкилотларига ёрдам бериш ва терроризмни молиялаштиришда гумонланаётгани ҳақида билдиришнома юборди. Бу ҳақда вазиятдан хабардор манбага таяниб, «Интерфакс-Украина» хабар берди.

Порошенко Украинадан ташқарида бўлгани сабабли, тегишли билдиришнома унинг регистрация, иш ва турар жойи бўйича очилган почтасига юборилди, деган ҳуқуқ-тартибот идораларидаги исми ошкор этилмаган манба.

«Европа бирдамлиги» партиясининг марказий штаб-квартираси раҳбари Александр Турчиновнинг айтишича, Порошенко «2014—2015 йиллардаги ҳарбий қарама-қаршилик шароитида ДХР ва ЛХРдан (ўзини республика деб эълон қилган Донецк ва Луганск халқ республикалари) кўмир келтириш ишида гумонланувчига айланган».

«Вазият ниҳоятда оғир эди, ҳарбий кескинлик юз бераётганди», — деди Турчинов. «Шундай шароитда ўша пайтдаги давлат раҳбарияти мамлакатнинг энергетик хавфсизлигини таъминлай олди».

Давлат тергов бюросида маълум қилинишича, Порошенко бир гуруҳ шахслар, хусусан, Россия олий раҳбарияти вакилларидан бўлган кишилар билан олдиндан тил бириктириб ЛХР ва ДХР террорчи ташкилотлари фаолиятига ҳисса қўшганликда гумон қилинмоқда.

Пётр Порошенко аввалроқ барча айбловларни рад этиб, уларни «тўқима, сиёсий мотивга асосланган ва сиёсий рақибларга қарши қора пиарнинг классик намунаси» деб атаганди.

17 декабрь куни Давлат тергов бюроси Порошенко сўроқ учун чақирув қоғозини бермоқчи бўлган терговчиларга эътибор бермагани, сўнг номаълум томонга жўнаб кетганини хабар қилган. «Европа бирдамлиги» Порошенконинг дипломатик ташриф билан Туркия ва Польшага  кетганини билдирди. 20 декабрь куни Александр Турчинов режалаштирилган учрашувлар ва қисқа таътилдан сўнг Порошенко Украинага қайтишини айтди.

Кўмир келтириш бўйича ишда, шунингдек, «Мухолифатчи платформа – «Ҳаёт учун» партияси раҳбари Виктор Медведчук ва Украинанинг собиқ энергетика вазири Владимир Демчишин ҳам  гумонланмоқда, дейилади хабарда.