Афғонистонда ҳокимиятни қўлга олган «Толибон» ҳаракати аъзолари Кобул кўчаларида қолган юзи очиқ аёлларнинг суратларини йўқ қилишни бошлади. Бу ҳақда пойтахт маъмурияти амалдорларига таяниб, Aamaj News хабар берди.
Кобул маъмуриятининг веб-сайтида айтилишича, айни дамда «ғайриисломий фотосуратлар»ни ўчириш жараёни давом этмоқда.
«Толибон» Афғонистон пойтахтини эгаллаб олишидан олдин, масалан, тўй салонларининг ойналарига юзлари, соч ва қўллари очиқ аёлларнинг суратларини ёпиштириш, ҳинд ва турк фильмлари намойиш этиладиган кинотеатрларнинг афишаларига актрисаларнинг кўпинча очиқ кийимдаги тасвирларини тушириш жуда кенг тарқалган амалиёт эди.
Бундан ташқари, шаҳар марказидаги бетон деворларга чизилган кўплаб тасвирлар, жумладан, қиз ва аёлларнинг юзи очиқ ҳолдаги суратлари 20 йил давомида хориж қўшинларига мезбонлик қилган Кобулнинг ўзига хос белгисига айланганди.
Афғонистон пойтахтини қўлга киритгач, «Толибон» жангарилари аёллар тасвири туширилган чизмалар ва афишаларни бўяб ташлашни бошлади. Бироқ кейинчалик бу жараён тўхтатилган. Энди, афтидан, «Толибон» пойтахт кўчаларидаги аёлларнинг суратларидан бутунлай халос бўлмоқчи, дейилади хабарда.
Аввалроқ «Толибон» аёллар иштирок этган бир қатор теледастурларни эфирга узатишни тақиқлаганди. Шунингдек, толиблар Кобулда бир неча ўн йиллар давомида фаолият юритиб келган тарихий «Ариана» кинотеатрини ёпишга қарор қилганди. «Толибон» ҳинд, Европа ва Америка фильмлари кўпроқ намойиш этиладиган кинотеатрларнинг иши шариат қонунларига зид, деган хулосага келган.
Изоҳ (0)