Ukraina sobiq prezidenti Pyotr Poroshenko davlatga xiyonatda gumonlanmoqda

Ukraina Davlat tergov byurosi mamlakatning beshinchi prezidenti, “Yevropa birdamligi” partiyasi yetakchisi Pyotr Poroshenkoga uning davlatga xiyonat qilish, terrorchilik tashkilotlariga yordam berish va terrorizmni moliyalashtirishda gumonlanayotgani haqida bildirishnoma yubordi. Bu haqda vaziyatdan xabardor manbaga tayanib, “Interfaks-Ukraina” xabar berdi.

Poroshenko Ukrainadan tashqarida bo‘lgani sababli, tegishli bildirishnoma uning registratsiya, ish va turar joyi bo‘yicha ochilgan pochtasiga yuborildi, degan huquq-tartibot idoralaridagi ismi oshkor etilmagan manba.

“Yevropa birdamligi” partiyasining markaziy shtab-kvartirasi rahbari Aleksandr Turchinovning aytishicha, Poroshenko “2014—2015-yillardagi harbiy qarama-qarshilik sharoitida DXR va LXRdan (o‘zini respublika deb e’lon qilgan Donetsk va Lugansk xalq respublikalari) ko‘mir keltirish ishida gumonlanuvchiga aylangan”.

“Vaziyat nihoyatda og‘ir edi, harbiy keskinlik yuz berayotgandi”, — dedi Turchinov. “Shunday sharoitda o‘sha paytdagi davlat rahbariyati mamlakatning energetik xavfsizligini ta’minlay oldi”.

Davlat tergov byurosida ma’lum qilinishicha, Poroshenko bir guruh shaxslar, xususan, Rossiya oliy rahbariyati vakillaridan bo‘lgan kishilar bilan oldindan til biriktirib LXR va DXR terrorchi tashkilotlari faoliyatiga hissa qo‘shganlikda gumon qilinmoqda.

Pyotr Poroshenko avvalroq barcha ayblovlarni rad etib, ularni “to‘qima, siyosiy motivga asoslangan va siyosiy raqiblarga qarshi qora piarning klassik namunasi” deb atagandi.

17-dekabr kuni Davlat tergov byurosi Poroshenko so‘roq uchun chaqiruv qog‘ozini bermoqchi bo‘lgan tergovchilarga e’tibor bermagani, so‘ng noma’lum tomonga jo‘nab ketganini xabar qilgan. “Yevropa birdamligi” Poroshenkoning diplomatik tashrif bilan Turkiya va Polshaga  ketganini bildirdi. 20-dekabr kuni Aleksandr Turchinov rejalashtirilgan uchrashuvlar va qisqa ta’tildan so‘ng Poroshenko Ukrainaga qaytishini aytdi.

Ko‘mir keltirish bo‘yicha ishda, shuningdek, “Muxolifatchi platforma – “Hayot uchun” partiyasi rahbari Viktor Medvedchuk va Ukrainaning sobiq energetika vaziri Vladimir Demchishin ham  gumonlanmoqda, deyiladi xabarda.