Ижтимоий тармоқларда Халқ депутатлари Жиззах вилояти кенгашининг 20 декабрь кунига белгиланган сессиясида вилоят ҳокими Эргаш Солиевнинг мурожаатнома йўллаши (айни вақтда бўлиб ўтмоқда) ва унда депутатлардан ҳокимига савол бермаслик талаб қилинаётгани ҳақида хабарлар тарқалди, деб ёзади «Gazeta.uz».
Таъкидланишича, шаҳар ва туман кенгашларининг депутатлари, доимий комиссиялар раислари ва котибиятлар раҳбалари расмий формада (оқ кўйлак, қора шим, галстук, депутатлик нишони, гувоҳномада) ташриф буюриши керак.
Шунингдек, вилоятдаги кенгашлар котибиятлари мудирларига йўлланган хатда сессияга телефон билан қўйилмаслиги ҳақида огоҳлантирилгани айтилмоқда. Бундан ташқари, мажлис иштирокчилари залда соат 09:00 да бўлиши, рўйхатдан ўтиши ва белгиланган жойини 09:30 да эгаллаши керак. Сессияда саволлар берилмайди.
«Агар сессия кун тартиби бўйича интервью берадиганлар бўлса, вилоят ҳокими мурожаатидан келиб чиқиш лозим ҳамда сессия бўлиб ўтаётган жараёнда саволлар берилмайди», — дейилган хатда.
Қонунчилик палатаси депутати Расул Кушербаевнинг ёзишича, унга жиззахлик депутатлар «сессиясда мазкур чекловларга талаблар вилоят кенгаши котибияти мудирининг ташаббуси билан қилинганини» айтган.
«Яъни котибият мудири бўлган депутатнинг ўзи депутатларга чеклов ўрнатмоқчи», — дея фикр билдирган депутат.
«Жиззах ҳуқуқий мақомига кўра қандай ҳудуд? Билишимизча, у ҳамон Ўзбекистон такибидаги битта вилоят. Депутатда мол-мулкига нисбатан ҳам дахлсизлик ҳуқуқи мавжудлиги сабабли, сессияга шахсий телефонлари билан киритмаслик бўйича чеклов ўрнатилиши ҳам ғайриқонуний», — деб ёзади Кушербаев.
У Жиззах ҳам Конституцияси бор Ўзбекистоннинг бир қисмидаги ҳудуд сифатида Ўзбекистон қонунларига амал қилиши ва ҳокими депутатларнинг саволларига жавоб беришига умид билдирган.
Котибиятнинг муносабати
Жиззах вилояти ҳокимияти матбуот хизмати вилоят Кенгаши котибиятининг муносабатини эълон қилди.
Таъкидланишича, Халқ депутатлари маҳаллий Кенгашларининг регламентига асосан, депутатлар депутатлик одоби ва талабларидан келиб чиққан ҳолда ўтказиладиган сессияларга расмий кийимда келиши керак бўлади.
Ссессия йиғилиши вилоят телевиденияси ҳамда ижтимоий тармоқларда тўғридан-тўғри ёритилишини инобатга олган ҳолда сессия йиғилишига халақит бермаслик мақсадида телефон овоссиз ҳолатга келтириш тавсия этилган. Айрим туманларнинг узоқлиги сабабли регламентга асосан, депутатларнинг сессия йиғилишига кечикиб келишига йўл қўймаслик учун эслатилган», — дейилади муносбатда.
Халқ депутатлари маҳаллий Кенгашлари регламентининг 61-моддасига асосан, вилоят ҳокими ҳар йили вилоят Кенгашига ҳудуд ижтимоий-иқтисодий ривожланишнинг энг муҳим ва долзарб масалалари юзасидан ҳисобот тақдим этиши белгиланган.
«Ушбу сессия кун тартибига киритилган (вилоят ҳокимининг) мурожаатномаси барча депутатлар иштирокида доимий комиссиялар йиғилишида батафсил муҳокама этилган ҳамда сессиядан кейин очиқ тарзда матбуот анжумани ўтказилиши режалаштирилган ва депутатлар матбуот анжуманига таклиф этилган», — дея қайд этилади хабарда.
«Депутат — мактаб ўқувчиси эмас»
Расул Кушебаевнинг ёзишича, ижтимоий тармоқлардаги танқидлардан сўнг, депутатларга телефон олиб киришга рухсат берилган, бироқ «овозсиз режимни» ёқиб қўйиш талаб этилган. Шу билан бирга у «расмий кийим» борасидаги талабга тушунмаганини таъкидлаган.
«Чунки ўзим ҳам ‘расмий кийим’ нима эканини билмайман. Қонунчиликда бунинг тушунчаси йўқ афсуски: европача костюмми, қора кўйлакми ёки миллий чопонми ҳалиям номаълум», — дейди у.
«Фақат бир нарсани эсдан чиқармаслик керак: депутат мактаб боласи эмас, у минглаб одамлар томонидан сайланган, мустақил шахс. Оқ кўйлакда кел, телефонни ўчириб кел, саволсиз кел, каби гаплар мактаб боласига айтилади. Ўзи ‘Кенгаш раиси масаласи’ ҳал бўлмагунча маҳаллий депутатлар ишида ўнгланиш бўлмаслиги кўриниб турибди», — деб ёзади Расул Кушербаев.
Эслатиб ўтамиз, 2020 йилнинг 15 сентябрида президент «Халқ депутатлари Кенгашлари фаолияти такомиллаштирилиши муносабати билан Ўзбекистон Республикасининг айрим қонун ҳужжатларига ўзгартишлар киритиш тўғрисида»ги қонунни имзолаганди. Улар халқ депутатлари Кенгашлари фаолиятига ташкилий-техник ва бошқа хизматлар кўрсатиш билан шуғулланади. Олдинлари бу билан ҳокимликлар аппарати шуғулланган бўлиб, бу ҳокимиятларнинг бўлиниши тамойилига зид эди. Сенат раиси Танзила Норбоева депутатлар узоқ йиллар давомида алоҳида котибиятнинг ташкил этилиши тўғрисида орзу қилганларини таъкидлаб ўтганди.
Изоҳ (0)