Қашқадарё вилояти ҳокими Муроджон Азимов 2021 йилги ижтимоий-иқтисодий ривожланиш якунлари ҳамда 2022 йил учун белгиланган вазифалар юзасидан аҳолига мурожаатномасида Қарши шаҳридаги «Шодлик» маҳалласида жойлашган 2-сонли ётоқхона ҳақида гапириб, ҳолат уни ташвишга солганини билдирди. Бу ҳақда сессияда қатнашаётган «Дарё» мухбири хабар берди.
«Қарши шаҳридаги ‘Шодлик’ маҳалласида жойлашган ётоқхона масаласига ҳам тўхталиб ўтишим жоиз. Ижтимоий тармоқларда ёритилган мазкур муаммони жойига бориб, ўзим ўргандим. Аҳоли билан мулоқотда бўлдим. Мени қаттиқ ташвишга солгани, ётоқхонада ҳеч қандай шароити бўлмаган хоналарда яшаётган фарзандлар таълим-тарбияси ва тақдири қандай кечади? Тезлик билан бу ерда ҳомийлик асосида таъмирлаш ишлари бошлаб юборилди. Вилоят раҳбари сифатида айтишим керак, ётоқхонада турадиган ҳар бир инсоннинг тақдири алоҳида эътиборга олинган», — дейди вилоят раҳбари.
Қайд этилишича, Муроджон Азимов уй-жойга эҳтиёжи бор бўлган фуқароларга уй-жой берилишини, даволаниши зарур бўлганларга тиббий хизмат кўрсатилишини, ёлғиз, боқувчисини йўқотган одамларнинг тақдири эътиборида эканини айтган.
Аввалроқ Қарши шаҳрининг «Шодлик» маҳалласида жойлашган 2-сонли ётоқхона хароб аҳволда экани, вилоят ва шаҳар ҳокимлиги ҳолатга эътибор қаратмаётгани ҳақида хабар берилганди. Шундан сўнг вилоят ҳокимлиги мазкур шикоятга эътибор қаратиб, ётоқхона тадбиркорга тегишли мулк эканини ёзди ва тадбиркорлик субъектида давлат маблағлари ҳисобидан таъмирлаш ишларини олиб бориш қонунга зид эканини таъкидлади. 13—14 декабрь кунлари мазкур ётоқхонада ҳомийлар ҳисобидан таъмирлаш ишлари бошлаб юборилган.
Изоҳ (0)