Ижтимоий тармоқда Сурхондарё вилоятида Сариосиё туманида жойлашган «Шарғункўмир» АЖ ходимларига ойлик иш ҳақлари берилмагани айтилган хабар тарқалди. Бандлик ва меҳнат муносабатлари вазирлиги ҳолатга муносабат билдирди.
Хабарда корхонанинг оддий кончиси эканини айтган фуқаро оғир шароитда ишлашини, ишчилар байрам пули у ёқда турсин, ойлик иш ҳақларини ҳам олмаганини билдирган. Сурхондарё вилояти Бандлик бош бошқармаси Давлат меҳнат инспекцияси бу бўйича ўрганиш ишлари олиб борган.
Маълум бўлишича, ҳақиқатан ҳам 15 декабрь ҳолатига кўра, «Шарғункўмир» раҳбарияти томонидан ходимларга 2,5 миллиард сўм миқдордаги ойлик иш ҳақлари тўлаб берилмагани аниқланган.
Давлат меҳнат инспекцияси томонидан «Шарғункўмир» АЖ раҳбариятига фуқароларнинг тўланмай қолган маошини бериш бўйича ёзма кўрсатма киритилган ва ходимларнинг иш ҳақини ўз вақтида тўлашда Меҳнат кодексининг 154, 161-моддалари талабларига риоя қилиш юзасидан тушунтириш берилган.
Эслатиб ўтамиз, бу «Шарғункўмир» корхонаси ва унинг ишчи ходимлари ўртасида тушунмовчилик ва норозилик юзага келган биринчи ҳолат эмас. 2019 йилнинг 14—15 август кунлари корхонанинг қарийб 200 нафар кончиси иш ташлаган. Норозилик акциясига оғир меҳнат шароитлари ва корхона раҳбариятининг ноқонуний ҳатти-ҳаракатлари сабаб бўлган. Махсус комиссия норозилик ҳолатларини атрофлича ўрганиб чиқиб, 9 нафар мансабдор шахс ўз лавозимидан озод этилган.
Мавзуга доир:
- Қашқадарёда ишчиларидан салкам 2 млрд сўм қарздорлиги бўлган ташкилот ходимлари вилоят ҳокимлигида тўпланди
- «Бунёдкор» футбол клуби ўз ходимларига 1,5 млрд сўмдан кўпроқ маошларни тўлаб беришни кечиктиргани аниқланди
- «Бир ойлик иш ҳақим 20 минг сўм чиқибди, баъзиларга 450 сўм тўланган». UzAuto Motors ходимлари иш ташлаш эълон қилди
Изоҳ (0)