Тошкент вилояти ЙҲХБга тегишли Malibu-2 нинг 11 та тўланмаган жаримаси борлиги ҳақидаги хабарларга изоҳ берилди

Ижтимоий тармоқда Malibu русумли 01 010 VSG давлат рақам белгили махсус хизмат автомобилининг ўз муддатида бартараф қилинмаган 11 та қарздорлиги борлиги ҳақида хабарлар тарқалди. ЙҲХББ ҳолат юзасидан расмий маълумот берди.

Маълум қилинишича, ҳолат юзасидан Тошкент вилояти ИИББ ЙҲХБ масъул ходимлари томонидан суриштирув ўтказилди. Суриштирувга кўра, ушбу автомобиль билан боғлиқ бўлган 2 та ҳолатда содир этилган қоидабузарлик ҳолатлари юзасидан жарималар ўрнатилган тартибга кўра ундириш чоралари кўрилди.

Қолган 9 та ҳолатдаги белгиланган жарималар вилоят ИИББ ЙҲХБ навбатчилик қисмининг қайд этиш китоби билан солиштирувларга кўра, кечиктириб бўлмас вазифаларни бажариш, кузатув ишларини амалга ошириш жараёнида қайд этилгани аниқланган.

Маъмурий жавобгарлик тўғрисидаги кодекснинг 17-1-моддасининг 5-хатбошиси (тезкор ва махсус хизматларнинг транспорт воситалари, шунингдек, улар кузатиб келаётган транспорт воситалари томонидан йўл ҳаракати қоидаларига мувофиқ имтиёздан фойдаланган ҳолда содир этилган маъмурий ҳуқуқбузарликлар махсус фото ва видео қайд этишнинг автоматлаштирилган техник воситалари орқали қайд этилган тақдирда ҳамда кечиктириб бўлмайдиган хизмат вазифаларини бажарганликни тасдиқловчи ҳужжатлар тақдим этилганда ҳайдовчиларнинг маъмурий қоидабузарлиги охирги зарурат ҳолатларида содир этилган деб топилади ва маъмурий иш ушбу кодекснинг 271-моддасига мувофиқ тугатилади) ҳамда 271-моддаси биринчи хатбошисининг тўртинчи кичик бандига мувофиқ мазкур 9 та қоидабузарлик бўйича қарорлар бекор қилинган.

«Ушбу келтириб ўтилган Malibu русумли, 01 010 VSG давлат рақам белгили автомобиль махсус транспорт воситаси экани, тезкор, кечиктириб бўлмас вазиятларда йўл ҳаракати хавфсизлигини таъминлаш шарти билан қоидаларнинг VII боб (38-бандидан ташқари), IX—XVI, XIX–ХХ боблари, 1 ва 2-иловалари талабларидан четга чиқишга рухсат берилишини инобатга олиш мақсадга мувофиқдир», — дейилади ЙҲХББ хабарида.

Бундан аввал Tracker’ининг қарийб 150 миллиом сўмлик қарзи борлиги ва у ЙҲХББ бошлиғи Олим Саидовга тегишли экани юзасидан раддия берилганди.