Ғиждувон тумани ҳоким Шерзод Ашуров халқ депутатлари маҳаллий кенгашининг навбатдаги 49-сессиясида журналистлар билан мулоқотда ёшлар ташкилотининг айни кунлардаги фаолиятидан қониқмаётганини билдирди. Бу ҳақда «Дарё» мухбири хабар бермоқда.
«Бугунги кунда давлат ва маҳаллий бюджетлар, шунингдек, йирик хорижий инвестиция маблағлари эвазига кенг кўламда ишлар бошлаб юборилган. Шу йилларга қадар ҳам ҳавас қилгулик ишлар бажарилган. Яратилаётган шарт-шароитлар, имкониятларнинг ҳаммаси аҳолимиз, айниқса, ёшларимиз келажаги учун.
Бугун туманда 14 ёшдан 30 ёшгача бўлган ёшлар сони 84 114 нафарни ташкил этади. Туманда фаолият бошлаганимга олти ойга яқинлашиб қолди. Рақамларни бир-бир кузата туриб, оғринаман. Тумандан ҳалигача бирорта на илм-фан, на спорт ва на санъат соҳасида дунё танийдиган битта нафар ҳам ёшлар етишиб чиқмаган экан. Қайси ёшимизни дунё танийди? Ёшлар сиёсати давлат сиёсати даражасига кўтарилган шу йиллар орасида ёшлар ташкилотлари нималар билан шуғулланган?
Бугунги саъй-ҳаракатларидан ҳам қониқмайман, ҳоким сифатида рози эмасман. Ғайрат, шиддат билан ишлаш талаб этиладиган даврдамиз. Мен туман ёшлар ташкилотлари раҳбаридан эътиборсизлик ва хўжакўрсинликни батамом тарк этишларини сўрайман», — деди Шерзод Ашуров.
Маълумки, 2021 йилнинг октябрь ойида Ғиждувон тумани ҳокими ўз хизмат хонасини ёшларга бўшатиб берган эди. Айни кунда ушбу синфларда 35 нафар ўқувчи физика ва математика фани бўйича олимпиадаларга тайёрлайдиган махсус дастур асосида ўқитилмоқда.
«Мақсад физика ва математика фанлари бўйича вилоят, мамлакат ҳамда халқаро миқёсда ўтказиладиган олимпиадаларда айнан шу ёшларнинг муносиб иштирок этишини таъминлашдир. 35 нафар ўқувчи туман мактабларининг 7-синфларида ўқийдиган 42 800 нафар болалар орасидан имтиҳон орқали саралаб олинган ва улар бепул ҳам ўқитилиб, ҳам иссиқ овқат билан таъминланган.
Тўрт нафар ўқитувчи мукаммал дарс беради. Бу болаларимиз президент мактабларида, Қоракўл туман ихтисослаштирилган мактабларида ўқийдиган ўқувчилар билан рақобатда бўлади. Яқиндагина ўтказилган тест натижаларига кўра, шу синфда ўқийдиган 7-синф ўқувчилари мактабдаги фан ўқитувчисидан кўра юқори баллни қўлга киритишди. Демак, уч йил ичида мақсадимиз амалга ошади. Улар хориж олимпиадаларида, албатта, ютуққа эришишади. Бунга ишонаман», — деди ҳоким.
Таъкидланишича, туманда 67 та умумий ўрта таълим мактаби бўлиб, 14 таси таъмирга муҳтож аҳволда. Мазкур мактабларда олийгоҳларга кириш даражаси ҳам бор-йўғи 18 фоиздан камни ташкил этган.
Сессия давомида Шерзод Ашуровнинг маълум қилишича, туманнинг 17 минг нафар аҳолиси ишсиз. 9400 оиланинг даромади 1,5 миллион сўмдан кам, 4400 оила эса 880 минг сўмликкача бўлган даромадга эга.
«Улар муҳтож. Улар пул тополмаяпти. Энг асосий мақсад — уларнинг иш билан бандлигини таъминлаш. Яқинда туркиялик тадбиркор ўзининг йирик лойиҳаси билан иш бошлади. Лойиҳага кўра, 2000 нафарга яқин қизлар ишли бўлади. Гилам тўқишга мослаштирилган ушбу тадбиркорлик маркази учун замонавий бино ажратилган. Яқиндагина иш жараёнлари билан танишиш мақсадида марказга кирдим. Ишонсангиз, қизларнинг қарийб ярмининг бир қўлида телефон, бир қўлида гилам тўқиш илмоғи (кручок).
Бир дона ипни ўтказиши 5 сўм. Бу бир кунда 80 мингдан 100 минг сўмгача ишласа бўлади, дегани. Ойлик кам берилади эмас, меҳнат кам қиляпти ёшлар. Бу эса кутилаётган самара ва сарфланаётган маблағни ҳавога учиради, холос. Шунга кўра, маиший хизматнинг барча турларига йўналтирилган ҳунарга ўргатув ва ўқитув ишлари йўлга қўйилди. 40 нафар қиз бириктирилди. Уларнинг ҳар бирига 600 минг сўмгача маош берилиб, йўл ва овқатланиш харажатлари ҳам қопланмоқда. Бундан ташқари, 23 нафар қиз, жувон эса ҳунар ва касбга ўқитувчиликка тайёрланмоқда. Уч ойдан сўнг улар 2000 нафар қизларни бошқаришади», – деди ҳоким.
Изоҳ (0)