Давлат хавфсизлик хизмати Самарқанд вилояти бошқармаси, прокуратура ва ички ишлар бошқармалари ходимлари билан ўтказилган тезкор тадбирда 34 минг долларга ер сотмоқчи бўлган фуқаро қўлга олинган. Бу ҳақида «Дарё»га ДХХ Самарқанд вилояти бошқармаси маълум қилди.
Таъкидланишича, Булунғур туманида яшовчи фуқаро Ш.Б. сотиш ҳуқуқига эга бўлмай туриб, ўзига тегишли 50 сотих ер майдонини 34 минг долларга маҳаллий фуқарога сотишга келишиб, ундан 10 минг долларини олган вақтда ашёвий далиллар билан ушланган.
Шунингдек, Давлат солиқ қўмитаси ҳузуридаги Давлат кадастрлар палатаси Булунғур тумани филиалининг юқори лавозимида ишловчи ходими ушбу ер майдонини тегишли кадастр ҳужжатларини тайёрлаб бериш эвазига 3 минг доллар талаб қилгани аниқланган.
Олинган кўрсатмалар асосида тадбир давом эттирилиб, Давлат кадастрлар палатаси Булунғур тумани филиали ходими 3 минг долларни ўз хизмат автомашинасида олган вақтда тезкор ходимлар томонидан ашёвий далиллар билан қўлга олинган.
Ҳозирда мазкур ҳолат бўйича Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.
Аввалроқ Олмазор тумани ҳокимлиги мансабдори 12 гектар ерни 1,5 млн доллар эвазига олиб бермоқчи бўлганида ушлангани, Чинозда 1,8 гектар ерни 25 минг долларга ноқонуний сотмоқчи бўлган аёл қўлга олингани, Тошкент вилоятида ўзгага ажратилган 20 сотих ерни 110 минг долларга сотишга уринган шахс ушлангани тўғрисида хабар берилганди.
Изоҳ (0)