Bugun,

  • USD 11095.31
  • RUB 173.84
  • EUR 10772.44

Dunyoning 28 ta davlati o‘quvchilari o‘rtasida 20—26-aprel kunlari onlayn tarzda o‘tkazilgan 55-Xalqaro Mendeleyev kimyo olimpiadasida O‘zbekistondan qatnashgan 7 nafar o‘quvchining barchasi g‘oliblikni qo‘lga kiritdi. Bu haqda Xalq ta’limi vazirligi matbuot xizmati xabar berdi.

Foto: Xalq ta’limi vazirligi matbuot xizmati

Foto: Xalq ta’limi vazirligi matbuot xizmati

Olimpiadada Avstriya, Xitoy, Turkiya, Rossiya, Saudiya Arabistoni, Isroil, Xorvatiya, Vengriya va boshqa mamlakat jamoalari bilan birga O‘zbekiston terma jamoasi ham ishtirok etgan. Xalqaro olimpiada Xalq ta’limi vazirligining Fan olimpiadalari bo‘yicha iqtidorli o‘quvchilar bilan ishlash departamenti tomonidan Toshkent shahri, Yunusobod tumanidagi 9-Axborot texnologiyalarga ixtisoslashtirilgan maktabda o‘tkazildi va jarayonlar tashkiliy qo‘mita tomonidan jami 17 ta vebkamera va mikrofon orqali kuzatib borilgan.

Xalqaro olimpiada ikkita nazariy turda o‘tkazilgan bo‘lib, ilk bosqichda barcha ishtirokchilar 8 ta majburiy masala ishlagan bo‘lsa (jami 80 ball), ikkinchi bosqichda kimyo fanining 5 bo‘limiga oid 15 masaladan ixtiyoriy 5 tasini ishlash talab qilingan (jami 75 ball). Ikki bosqich natijalariga ko‘ra g‘olib o‘quvchilar aniqlangan.

Yakuniy natijalarga ko‘ra, O‘zbekiston sharafini himoya qilgan o‘quvchilar 1 ta oltin, 4 ta kumush va 2 ta bronza medallari bilan taqdirlangan. 2020-yilgi 54-Xalqaro Mendeleyev kimyo olimpiadasida O‘zbekiston terma jamoasi 1 ta oltin va 5 ta bronza medalini qo‘lga kiritgan edi. Bugungi kungacha O‘zbekiston terma jamoasining hisobida 7 ta oltin, 20 ta kumush va 51 ta bronza medali mavjud.

G‘olib ishtirokchilarga diplomlar va medallar hamda sovg‘a qilinadigan kitoblar tashkiliy qo‘mita tomonidan pochta orqali jo‘natiladi.

55-Xalqaro Mendeleyev kimyo olimpiadasida sovrindor o‘rinlarni qo‘lga kiritgan o‘quvchilar:

Oltin medal:

Firdavs Sobirov — Buxoro shahar 35-umumiy o‘rta ta’lim maktabi o‘quvchisi.

Kumush medal:

  • Azimjon Jamolov — Abu Ali ibn Sino nomidagi yosh biologlar va kimyogarlar ixtisoslashtirilgan maktab-internati o‘quvchisi;
  • Sobirjon Omonov — Toshkent pediatriya tibbiyot instituti akademik litseyi o‘quvchisi;
  • Nafisa Normurodova — Toshkent pediatriya tibbiyot instituti akademik litseyi o‘quvchisi;
  • Durdona Muxtorxo‘jayeva — Abu Ali ibn Sino nomidagi yosh biologlar va kimyogarlar ixtisoslashtirilgan maktab-internati o‘quvchisi.
Bronza medal:
  • Ikromiddin Boymahammadov — Abu Ali ibn Sino nomidagi yosh biologlar va kimyogarlar ixtisoslashtirilgan maktab o‘quvchisi;
  • Begzod Ro‘ziboyev — Toshkent pediatriya tibbiyot instituti akademik litseyi o‘quvchisi.
Ma’lumot uchun, Xalqaro Mendeleyev kimyo olimpiadasi MDH, Boltiqbo‘yi va Janubiy-Sharqiy Yevropa davlatlarining iqtidorli o‘quvchilari ishtirok etib kelayotgan xalqaro olimpiadalardan biri hisoblanadi. Ushbu olimpiadada turli davlatlarning yuqori sinf o‘quvchilaridan iborat terma jamoalar ishtirok etadi.

Mazkur olimpiada 1966-yildan boshlab har yili turli davlatlarda o‘tkazib kelinmoqda. Bugungi kunda dunyoning 30 mamlakatidan 200 nafar eng iqtidorli o‘quvchi kimyo fanidan murakkab va nostandart masalalarni yechishda bellashadi.

Izoh
Asosiy yangiliklar
Mahalliy
O‘zbekistonda dollar kursi yana tushdi 
Dunyo
Ozarbayjon o‘z fuqarolarini Eronga bormaslikka chaqirdi
Iqtisodiyot
O‘zbek so‘mi 2022-yilda dollarga nisbatan 3,9 foizga qadrsizlandi. Milliy valyutaning almashuv kursi qanday o‘zgardi?