2022 йил Самарқанд вилоятида инфратузилмани яхшилаш учун 274,4 миллиард сўм ажратилади. Бу ҳақда Самарқанд вилояти ҳокими Эркинжон Турдимов халқ депутатлари Самарқанд вилоят кенгашининг 50-сессиясидаги мурожаатида маълум қилди, дея хабар бермоқда «Дарё» мухбири.
Хусусан, 59,9 миллиард сўмга 86 километр автомобиль йўллари, 148 километр янги электр тармоқлари тортиш учун 49,7 миллиард сўм, 24,6 километр табиий газ тармоқлари тортиш учун 8,4 миллиард сўм, 284 километр сув ва оқова сув тармоқлари тортиш учун 157,3 миллиард сўм ажратилади.
Эркинжон Турдимовнинг айтишича, Самарқанд шаҳридаги Амир Темур кўчасини таъмирлаш шундоқ ҳам тирбандлик кўплиги сабаб кечиктирилган.
«Кейинги йил Амир Темур ҳамда Гагарин кўчаси Абу-Даби фонди маблағлари ҳисобидан девордан деворгача усулида таъмирланади. Гагарин кўчаси эса давом эттирилиб, Мотриддаги янги Қорасув массивигача олиб борилади. Натижада янги шаҳарчага айланган Қорасувга боришдаги тирбандлик бартараф этилиши кўзланмоқда. Шунингдек, келаси йил Самарқандда яна иккита туннел ва иккита йўл ўтказгич кўприк қурилади», — дейди вилоят ҳокими.
Мурожаатда маълум қилинишича, бугунги кунда вилоятдаги ОТМларда 63 мингдан ортиқ талаба ўқимоқда. Бу ўтган 5 йилликка қараганда 5 баравар кўп. Вилоят ҳокими айни дамда Самарқандда бошқа вилоятлар ва узоқ туманлардан қатнаб ўқийдиганлар кўплиги учун 17,1 минг ўринли талабалар турар жойларига эҳтиёж мавжудлигини таъкидлаган. Шу сабабли халқ тилида «Макаронка» деб аталадиган «Бирлик» маҳалласи ҳамда Рўдакий кўчасидаги собиқ ғишт заводи ўрнида талабалар турар жойи қурилади.
«2022 йилги ижтимоий лойиҳалар асосида вилоятдаги онкология, кардиология касалхоналарида жиддий ўзгаришлар бўлади. 2 миллион еврога онкология маркази учун ички ва ташқи нур терапия аппаратлари ўрнатилади. Кардиология марказига эса 30 миллиард сўмга 48 турдаги замонавий ускуналар олиб келинади. Ургут ва Пахтачида кардиология маркази ташкил этилади», — дейди Эркинжон Турдимов.
Аввалроқ Самарқанд вилоятида 3 нафар ҳоким ва 20 нафар ҳоким ўринбосарига огоҳлантириш ҳамда ҳайфсан берилгани, Самарқандда «Минск» хиёбонидаги қурилиш бўйича жиноят иши қўзғатилгани тўғрисида хабар берилганди.
Мавзуга доир:
- «Мактабни ёмон қилган сиз билан бизмиз». Эркинжон Турдимов Самарқанддаги мактабларнинг шаклига ҳоким ва сектор раҳбарлари жавоб беришини маълум қилди
- «Тиббиёт соҳасини кенг жамоатчилик назоратисиз ўзгартириб бўлмайди» — Турдимов самарқандликлардан соҳадаги камчиликлар бўйича мурожаат йўллашни сўради
Изоҳ (0)