АҚШ Миллий архивлар ва ҳужжатлар бошқармаси 1963 йилда мамлакатнинг 35-президенти Жон Кеннедининг ўлдирилишига оид терговнинг янги ҳужжатларини эълон қилди, деб хабар беради «Коммерсантъ».
Таъкидланишича, МРБ, ФҚБ, Давлат департаменти ва АҚШдаги бошқа давлат тузилмаларига оид 1491 та ҳужжат бу борадаги маълумотлар ошкор этилиши бошланганидан бери энг йирик жамланмага айланган. Улар қаторида — расман ёлғиз-қотил ҳисобланувчи Ли Харви Освальднинг СССР ва Кубанинг Мехикодаги элчихоналари билан алоқаларига оид маълумотлар мавжуд.
Эълон қилинган ҳужжатларнинг бирида Ли Харви Освальд Кеннедини ўлдиришидан бир неча ой олдин Куба ва СССР элчихоналарига виза аризалари билан ташриф буюргани келтирилган. Яна бир ҳужжатда маълум қилинишича, Ли Харви Освальд СССР элчихонасининг консули билан учрашган, МРБ версиясига кўра, у КГБнинг «буюртма қотилликлари бўлими» билан боғлиқ бўлган.
Эслатиб ўтамиз, 2017 йилда АҚШда КГБ агентининг Жон Кеннедининг ўлдириб кетилиши ҳақидаги иш бўйича кўрсатмалари эълон қилинганди. Эълон қилинган материаллар орасида КГБ (Собиқ Иттифоқда Давлат хавфсизлиги қўмитаси) агенти Юрий Носенко билан интервьюдан 17 та аудиофайл бор, у 1964 йил январида, Кеннедининг ўлимидан кейингина АҚШга қочиб ўтган эди.
Изоҳ (0)