AQSh milliy arxivi 24-iyul kuni AQShning 35-prezidenti Jon Kennedining o‘limiga aloqador hujjatlarni e’lon qilishni boshladi, deb yozadi “RBK”. Ayni paytda FQB va MRBning 3,8 mingdan ortiq hujjatlari foydalanish uchun ochiq.
E’lon qilingan materiallar orasida KGB (Sobiq ittifoqda Davlat xavfsizligi qo‘mitasi) agenti Yuriy Nosenko bilan intervyudan 17 ta audiofayl bor, u 1964-yil yanvarida, Kennedining o‘limidan keyingina AQShga qochib o‘tgan edi.
“Nosenko KGB agenti bo‘lgan vaqtda Li Xarvi Osvald ishini olib borganini ta’kidlagan”, — deyiladi arxiv saytida. Aniqlik kiritilishicha, Nosenko bilan intervyu 1964-yilning yanvari, fevrali va iyulida yozib olingan.
Hujjatlarning e’lon qilingan qismi — Kennedining o‘ldirib ketilishi bilan bog‘liq va chop etilishi rejalashtirilgan materiallarning birinchi porsiyasi, xolos. Hujjatlar AQSh kongressi tomonidan 1992-yilda qabul qilingan qonunga muvofiq to‘plangan. Ushbu qonun barcha davlat muassasalariga AQShning 35-prezidenti o‘limiga bog‘liq materiallarni to‘plash va AQSh milliy arxiviga yuborishni yuklaydi.
Izoh (0)