Буюк Британияда рўйхатдан ўтган Delanore Limited компаниясининг раҳбари, Туркия фуқароси Асиe Жерен Чап ўз ихтиёри билан компания фаолиятини тугатиш тўғрисида ариза топширди. Бу ҳақда «Тurkmen.news» хабар берди.
2021 йилнинг октябрь ойида «Пандора архиви» ҳужжатларининг ошкор этилиши натижасида Delanore Limited компаниясининг ҳақиқий раҳбари Туркманистон президенти Гурбангули Бердимуҳамедовнинг жиянларидан бири Шомурод Режепов экани маълум бўлганди.
Компания Туркманистон кимё саноати маҳсулотлари ва Туркманистон нефть-газ соҳасидаги давлат корхоналари томонидан ишлаб чиқарилган нефть маҳсулотларининг сотуви билан шуғулланарди. Унинг фаолиятини тугатиш тўғрисида 8 ноябрда берилган ариза икки ой ичида қаноатлантирилиши керак.
Туркияда 2020 йилда очилган бошқа Delanore компанияси ҳамон ўз фаолиятини давом эттирмоқда, деб ёзади «Тurkmen.news».
Суриштирувчи-журналистлар халқаро консорциуми томонидан эълон қилинган «Пандора архиви» ҳужжатлари дунё сиёсатчиларининг молиявий жиноятларини фош этади. Ҳужжатларга кўра, Туркманистон минерал ўғитлар ва нефть-кимё маҳсулотларининг экспорт-импортида иштирок этадиган компанияларнинг асл эгалари Гурбангули Бердимуҳамедовнинг жиянлари Ҳожимурод ва Шомурод Режеповлар бўлиб чиққан эди.
Қайд этилишича, Ҳожимурод Режепов яширинча Caran компаниясини бошқаради, «Гарабогазкарбамид» заводида ишлаб чиқариладиган карбамид ўғитлари экспорти ушбу компания орқали ўтади. Завод 2018 йилда Япония халқаро ҳамкорлик банкидан олинган 1,16 миллиард доллар қарз ҳисобига қурилган. Аввалроқ Ҳожимурод Режепов бюджетдан озиқ-овқат учун ажратилган пулга ўзи учун 3 қаватли уй сотиб олгани маълум бўлган эди.
Ҳожимуроднинг укаси Шомурод Режепов эса юқорида айтилганидек, Delanor компаниясига алоқадор.
Изоҳ (0)