Turkmaniston mineral o‘g‘itlar va neft-kimyo mahsulotlarining eksport-importida ishtirok etadigan kompaniyalarning asl egalari Turkmaniston prezidenti Gurbanguli Berdimuhamedovning jiyanlari Hojimurod va Shomurod Rejepovlar bo‘lib chiqdi. Bu haqda Turkmennews va Gundogar nashrlari “Pandora arxivi” hujjatlaridan bilib oldi. Surishtiruvchi-jurnalistlar xalqaro konsorsiumi tomonidan e’lon qilingan mazkur hujjatlar dunyo siyosatchilarining moliyaviy jinoyatlarini fosh etadi.

Foto: OCCRP

Qayd etilishicha, Hojimurod Rejepov yashirincha Caran kompaniyasini boshqaradi,  “Garabogazkarbamid” zavodida ishlab chiqariladigan karbamid o‘g‘itlari eksporti ushbu kompaniya orqali o‘tadi. Zavod 2018-yilda Yaponiya xalqaro hamkorlik bankidan olingan 1,16 milliard dollar qarz hisobiga qurilgan.

Hojimurodning ukasi Shomurod Rejepov xuddi shu tarzda Delanor kompaniyasiga aloqador. Kompaniya Turkmaniston kimyo sanoati mahsulotlari va Turkmaniston neft-gaz sohasidagi davlat korxonalari tomonidan ishlab chiqarilgan neft mahsulotlarining sotuvi bilan shug‘ullanadi.

“Pandora arxivi”da e’lon qilingan hujjatlardan ma’lum bo‘lishicha, aka-uka Rejepovlar Dubayning nufuzli tumanlarida 16 ta kvartira sotib olgan.

C4ADS surishtiruvchi tashkiloti tomonidan OCCRP (Korrupsiya va uyushgan jinoyatchilikni o‘rganish markazi)ga taqdim etilgan Dubaydagi ko‘chmas mulk egalari ro‘yxatidan ma’lum bo‘lishicha, Hojimurod beshta turar joy majmuasida to‘qqizta kvartiraga, Shomurod yettita kvartiraga egalik qiladi.

“Ochilgan fayllarda sotib olingan sana ko‘rsatilmagan, lekin ma’lumotning bazaga kiritilgan vaqtiga qaralsa, mulk 2018-yildan keyin — Caran va Delanor’ning faolligi oshgan paytlarda sotib olingan”, — deyiladi surishtiruvda.

Ushbu majmualarda sotiladigan kvartiralarning narxidan kelib chiqib, surishtiruvchilar aka-ukalar tasarrufidagi ko‘chmas mulkning umumiy qiymatini 5,5 million dollarga baholadi.