Ўзбекистон ССВ марказий аппарати ходимларининг 40 фоизи вазифасидан озод этилди

Соғлиқни сақлаш вазирлигида 14 декабрь куни навбатдан ташқари Ҳайъат йиғилиши бўлиб ўтди. У ўта кескин руҳда кечиб, тизимда ҳар бир йўналиш бўйича йўл қўйилган хато ва камчиликлар танқидий таҳлил этилди, деб хабар берди ССВ матбуот хизмати.

Маълум қилинишича, кейинги пайтларда фуқароларнинг тиббиёт соҳасидан норози экани тўғрисида вазирликка жуда кўп мурожаатлар келган. Масалан, 2021 йилнинг ўтган 11 ойида келиб тушган жами мурожаатлар сони ўтган йилнинг шу даврига нисбатан қарийб 12 мингтага кўпайиб, 57 600 тани ташкил этган. Уларнинг энг катта қисмини сифатсиз тиббий хизмат кўрсатиш билан боғлиқ масалалар ташкил этади.

Қайд этилишича, фуқаролар ўртасида айрим касалликлар кўрсаткичлари йил сайин ошиб бормоқда. Хусусан, сўнгги беш йилда юрак-қон томир хасталикларига чалиниш ҳолатлари 20 фоизга кўпайган.

Қолаверса, битта туманда камида 10—15 та лаборатория бўлишига қарамай, қонни таҳлил қилишга шароит ва мутахассислар малакаси етишмаслиги оқибатида диабетнинг оғир асоратлари — кўз, буйрак ва тўпиқ касалликлари бўйича республика муассасаларига мурожаатлар 10 фоизга ошган.

«Буларнинг барчаси соғлиқни сақлаш соҳаси бошқарув тизимида бугунги замон талабларига мос, янгича фикрловчи, ташаббускор, муаммоли масалалар ечимига профессионал ва креатив ёндашадиган кадрлар етишмаслиги билан боғлиқ», — дейилади хабарда.

Шундан келиб чиқиб, Соғлиқни сақлаш вазирлиги марказий аппаратининг ўз фаолиятида натижа бермаган 40 фоиз ходимлари вазифасидан озод этилган ва уларга қуйи бўғин тиббиёт муассасаларида ишлаш таклиф қилинган.

Таъкидланишича, вазирлик доирасида бошланган кадрлар янгилаш ислоҳоти республикадаги барча даволаш-профилактика муассасаларини қамраб олади. Мазкур жараёнда аҳолидан келиб тушаётган эътироз ва шикоятлар асосий мезон бўлади.

Эслатиб ўтамиз, 10 декабрь куни Шавкат Мирзиёев видеоселектор йиғилишида эндокрин касалликларини бирламчи бўғинда эрта аниқлаш муаммоларига тўхталиб ўтганди. «Туманларда шароит ва мутахассислар малакаси етишмаслиги оқибатида, диабетнинг оғир асоратлари бўйича мурожаатлар ошган», — деган Шавкат Мирзиёев.

Аввалроқ соғлиқни сақлаш вазири Абдуҳаким Ҳожибоев лавозимидан озод этилгани ва у Ўзбекистон касаба уюшмалари федерациясига ўтиши кутилаётгани тўғрисида хабар берилганди. Шу куннинг ўзида Ўзбекистон президентининг тегишли фармони билан бош вазир ўринбосари лавозимида ишлаб келган Беҳзод Мусаев соғлиқни сақлаш вазири этиб тайинланган. Кейинчалик у собиқ соғлиқни сақлаш вазири томонидан қўлланган барча интизомий жазо чораларини олиб ташлаган.