«Туристик салоҳияти юқори туманларни ривожлантириш учун дастлабки босқичда 200 миллиард сўм ажратилади» – Шавкат Мирзиёев

Президент Шавкат Мирзиёев бошчилигида ўтказилаётган видеоселектор йиғилишида эндиликда туристик салоҳияти юқори бўлган туманларнинг «мастер плани» ишлаб чиқилиб, зарур инфратузилма билан таъминланиши, ерлар тадбиркорларга тайёр лойиҳа билан аукционга чиқарилиши маълум қилинди. Бу ишларни дастлабки босқичда бошлаш учун 200 миллиард сўм ажратилади, дея хабар қилмоқда «Дарё» мухбири.

Айни янгилик хизматлар соҳасини ривожлантириш учун ҳар бир ҳудудга алоҳида ёндашув асосида ишлаб чиқиладиган дастур доирасида ташкил қилинади. Дастурга кўра аҳоли сони, географик жойлашуви, иқтисодий салоҳиятидан келиб чиқиб, ҳудудларда хизматлар 3 та йўналишда ривожлантирилади. 158 та қишлоқ туманлар ихтисослашувидан келиб чиқиб ривожлантирилиши, йирик туристик объектлари мавжуд 45 та ҳамда 40 та тоғли ва тоғолди туманда «тайёр лойиҳа» (подключ) асосида туризм хизматлари йўлга қўйилади.

Президент томонидан масъул ташкилотларга икки ой муддатда халқаро молия ташкилотлари билан музокаралар ўтказиб, келгуси йилда туристик ҳудудларда инфратузилмани яхшилашга 100 миллион доллар жалб қилиш бўйича топшириқ берилди.

Эндиликда:

• янги меҳмонхона, дам олиш масканлари уч йил давомида мол-мулк ва ер солиғини 2 баробар паст ставкада тўлайди;
• туризм соҳаси учун махсус солиқ режими жорий этилиб, уч йил давомида айланмадан олинадиган солиқ ва ижтимоий солиқ 1 фоиз ставкада, мол-мулк ва ер солиқлари эса ҳисобланган суммадан 1 фоизи миқдорида белгиланади;
• оилавий тадбиркорлик дастурлари доирасида, меҳмон уйларини ташкил этиш ва таъмирлаш учун ҳам имтиёзли кредит ажратилади. Бу ишларга 2022 йилда 500 миллиард сўм йўналтирилиши маълум қилинди.

Масъул ташкилотларга бир ой муддатда махсус солиқ режими жорий қилинадиган туман ва шаҳарлар рўйхатини шакллантириб, қарор лойиҳасига илова қилиш топшириқ сифатида берилди.

Давлат раҳбари Шаҳрисабз туманининг Наврўз, Мираки, Оқдарё ва Ҳисор ҳудудларига йилига 500 мингга яқин сайёҳлар келиши, бироқ йўл, мобил алоқа ва интернет, меҳмонхона, умумий овқатланиш инфратузилмаси ривожланмагани боис сайёҳлар бир кунга келиб, уларга ўртача 150 минг сўмлик хизмат кўрсатилаётганини танқид қилди. Агар 60 миллиард сўм эвазига ушбу ҳудуддаги 65 километр йўлни таъмирлаб, интернет ва мобил алоқа ҳал қилиб берилса, хизматлар 3–4 баробарга ошиши қайд этилди.

Худди шундай, Қамашида жаҳонда саноқли ва ноёб бўлган «Майданак» обсерваторияси ҳамда 14-аср ёдгорлиги ҳисобланган «Лангар ота» масжиди бутун дунёдан туристларни жалб қилиши, аммо ушбу объектларга олиб борувчи 38 километр йўл таъмирталаб бўлгани учун (40 миллиард сўм зарур) Майданакнинг салоҳиятини тўлиқ ишга солиб бўлмаётгани танқид қилинди.