АҚШда коронавирус оқибатида ҳалок бўлганлар сони 800 минг кишига етди. Бу ҳақда Reuters агентлигига таяниб, «Korrespondent.net» хабар берди.
Нашрнинг аниқлик киритишича, АҚШда инфекция оқибатида вафот этганлар сони бутун Шимолий Дакота аҳолисидан ошиб кетган.
Таъкидланишича, мамлакатда 2021 йилда қурбонлар сони 2020 йилга нисбатан кўп бўлган: йил бошидан буён 450 мингдан ортиқ одам вафот этган — бу АҚШда пандемия бошланганидан буён жами вафот этганларнинг 57 фоизи демак.
Ўлим ҳолатларининг бу қадар ортишига узоқ вақт давомида АҚШ ҳудудида «ҳукмронлик» қилган анча юқумли ҳисобланувчи «дельта» штамми сабаб бўлгани айтилмоқда.
«Ўлим ҳолатларининг юқорилигига иккинчи сабаб — кўплаб америкаликларнинг коронавирусга қарши эмланишдан бош тортгани. Жорий йилда асосан эмланмаган беморлар вафот этди», — дейилади хабарда.
Reuters таҳлилларига кўра, 111 кунда АҚШда ўлим ҳолатлари сони 600 мингдан 700 мингга етган. Кейинги 100 минг ўлим ҳолати учун 73 кун кифоя қилган. Таъкидланишича, АҚШда ўлим ҳолатлари қўшни Канадага нисбатан уч баравар, Японияга нисбатан эса 11 баробар кўп. Европа Иттифоқи билан таққосланадиган бўлса, АҚШда сўнгги 11 ой ичида бутун G7 аъзо давлатларга қараганда 1,3 баравар кўп ўлим ҳолатлари қайд этилган.
«Дунё аҳолисининг 4 фоизи яшайдиган мамлакатга COVID-19 асоратлари оқибатида юзага келган барча ўлимларнинг қарийб 14 фоизи тўғри келмоқда», — дея қайд этади нашр.
Инфекция оқибатида юзага келадиган ўлимлар сони бўйича иккинчи ва учинчи ўринларда мос равишда Бразилия ва Ҳиндистон бормоқда.
Аввалроқ АҚШда мажбурий эмлашга қарши ҳаракат етакчиси анча аввал коронавирусга қарши эмлангани маълум бўлгани, Билл Гейтс пандемиянинг кучсизланиш муддатини прогноз қилгани, америкалик олимлар коронавирусга қарши қўлланиладиган сақич ишлаб чиққани тўғрисида хабар берилганди.
Изоҳ (0)