Буюк Британия бош вазири Борис Жонсон коронавируснинг янги «омикрон» штамми сабаб вояга етган барчага Янги йилга қадар ревакцинациядан ўтишга рухсат берди, деб хабар беради «Коммерсантъ». Бундан олдин ҳукумат вакцинанинг бустер дозасини одамлар январь охирига олиши мумкинлигини режалаштираётганди. Жонсон «омикрон» билан касалланиш тўлқинини кутмоқда.
«Ҳеч кимда шубҳа бўлмаслиги керак: ‘омикрон’ тўлқини яқинлашмоқда», — дейди Жонсон телемурожаатида. Унинг сўзларига кўра, вакцинанинг икки дозаси етарли эмас, бироқ учинчиси коронавируснинг янги вариантига қарши курашда катта аҳамиятга эга бўлиши мумкин.
Аввалроқ Жонсон Англияда «Б режани» жорий этганди — у одамлар уйдан туриб ишлашини, жамоат жойларида ниқоб тақиш мажбуриятини ва вакцина ҳужжатларидан фойдаланишни ўз ичига олади. Шотландия, Уэльс ва Шимолий Ирландия ўз чекловларини жорий этган. Буюк Британияда ҳозирда 3 мингдан ортиқ одамда «омикрон» штамми тасдиқланган.
Эслатиб ўтамиз, Британияда «омикрон» штамми туфайли 7 декабрдан мамлакатга кириш тартиби кучайтирилган эди. Унга кўра, мамлакатга кирувчи 12 ёшдан каттанинг барчаси ПЗР ёки LFD-тестининг(иммунохроматографик таҳлил усули билан ўтказилади) салбий натижасини тақдим этиши керак.Коронавируснинг янги «омикрон» штамми биринчи марта 11 ноябрь куни Жанубий Африкада топилган. Британиялик олимларнинг таъкидлашича, янги штамм тарқалиш тезлиги туфайли аввалгиларига, жумладан, дельтага қараганда хавфлироқ бўлиши мумкин. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди.
Изоҳ (0)