Пентагон собиқ маслаҳатчиси АҚШнинг махфий бўлинмаси сабаб Сурияда тинч аҳоли ўлдирилганини маълум қилди

Американинг Суриядаги махфий бўлинмаси ҳаракатлари оқибатида тинч аҳоли вакиллари қурбон бўлган, деб хабар беради «Коммерсантъ». Пентагон ва АҚШ Давлат департаменти собиқ маслаҳатчиси Ларри Льюиснинг маълум қилишича, қурбонлар сони Афғонистонда ўтказилган шу каби операцияларда ҳалок бўлганлардан ўн баробар ортиқроқ.

The New York Times’нинг (NYT) ўз манбасига таяниб ёзишича, махсус бўлинма номи Talon Anvil бўлиб, у 2014 йилдан 2019 йилга қадар фаолият кўрсатган. Унинг таркибига камида 20 киши кирган — улар Америка қуролли кучларининг зарбаларини мувофиқлаштирган. Уларнинг иштирокида ИШИДга қарши 112 мингга яқин бомба ва ракеталар учирилган. Talon Anvil зарбаларни автоколонналарга, қўмондонлик марказлари, миналаштирилган автомобиллар ва террорчилар отрядларига йўналтирган.

Маълумотларга кўра, Talon Anvil тинч аҳолини ҳимоя қилиш мақсадида ўрнатилган қоидаларга риоя қилмаган. Бунинг оқибатида фермерлар, болалар, оилалар ва бошқа тинч аҳоли ҳалок бўлган. Таъкидланишича, буйруқларни юқори мартабали ҳарбийлар эмас, балки Talon Anvil’да хизмат қилган «нисбатан пастроқ лавозимда» бўлган «Дельта» махсус кучларининг вакиллари берган.

Льюиснинг таъкидлашича, йилдан йилга Talon Anvil фаолияти оқибатида тинч аҳоли орасидаги қурбонлар сони ортиб борган. У Пентагоннинг махфий маълумотлари билан яхши танишлигини билдирган.

Газетанинг ёзишича, учувчилар баъзида Talon Anvil буйруғи асосида зарба беришдан бош тортган, чунки бўлинма аҳоли зич жойлашган ҳудудлардаги шубҳали нишонларни кўрсатган. Айрим операцияларда эса Talon Anvil’нинг алоҳида ҳарбийлари ҳам иштирок этишни истамаган. NYT’нинг маълумотларига кўра, махсус бўлинманинг ҳаракатлари Марказий разведка бошқармаси мутахассисларида қатор саволларни юзага келтирган. Бошқарманинг юқори мартабали ходимлари ўз хавотирларини раҳбариятга билдирган. Бироқ ҳаво операциялари раҳбарияти барча мурожаатларни бефарқ қолдирган.

Ноябрь ойида NYT АҚШнинг Сурияда амалга оширган бомбардимони оқибатида тинч аҳоли орасида энг йирик қурбонларга сабаб бўлган суриштирувини эълон қилган. АҚШ 80 кишини ўлдирганини тан олган. Ҳарбийларнинг таъкидлашича, уларнинг 16 нафари ИШИД аъзоси, тўрт нафари — тинч аҳоли бўлган. Улар қолган қурбонлар террорчи ёки тинч аҳоли бўлганини билмаган.

Аввалроқ Сурияда «Ал-Қоида» етакчиларидан бири АҚШ томонидан берилган авиазарба оқибатида ҳалок бўлгани тўғрисида хабар берилганди.