Қорақалпоғистонда алимент муаммоси сабаб собиқ турмуш ўртоғини ўлдирган эркакка суд ҳукми ўқилди. Бу ҳақда Zo‘r TV телеканалининг «Бу кун» информацион дастурида маълум қилинди.
Маълум қилинишича, фарзандларини кўргани келган фуқаро Э.Ў. алимент тўламай келгани сабаб собиқ турмуш ўртоғи билан жанжаллашиб қолган. Аёл эркакнинг юзига тарсаки туширганидан сўнг, эркак унга етти марта пичоқ урган.
Жиноят ишлари бўйича Қонликўл туманининг 2021 йил 23 август кунги Э.Ў.га нисбатан Жиноят кодексининг 97-модда (қасддан одам ўлдириш) 2-қисми бўйича тўпланган иши унинг адвокати томонидан келтирилган апелляция аризасига кўра кўриб чиқилган.
Апелляцияда фуқаро Э.Ў. собиқ ўртоғини қасддан ўлдирмагани келтирилган.
Мазкур иш Қорақалпоғистон Республикаси Судлов коллегияси томонидан кўриб чиқилиб, биринчи инстанция суди тарафидан Э.Ў.нинг ҳаракатлари Жиноят кодексининг 97-моддаси 2-қисми билан нотўғри квалификация қилинган деб ҳисобланган. Шу билан бирга, унинг иши Жиноят кодексининг 97-модда 1-қисми билан қайта квалификацияланган ва Э.Ў.га нисбатан 13 йилга озодликдан маҳрум этиш жазоси тайинланган.
Аввалроқ Тошкент вилоятида алиментдан қарзи бор эркак томонидан пичоқланган аёлнинг аҳволи ҳақида маълумот берилгани, Наманганда 3 нафар турмуш ўртоғидан ажрашган ва 5 нафар фарзандининг алиментларини тўламай келаётган ота ярим йилга қамалгани, Қашқадарёда алимент қарздорлигини ундиришга келган МИБ ходимини темир бўлаги билан урган шахсга жиноят иши қўзғатилгани тўғрисида хабар берилганди.
Изоҳ (0)