Наманганда Damas ўқувчи қизни уриб кетди, Навоийда Lada Vesta ағанади. ЙТҲ тафсилотлари

Ўзбекистонда сўнгги кунларда содир бўлган ЙТҲ тафсилотларини тақдим этамиз.

Учқудуқда Spark билан тўқнашган Lada ағанади.

2021 йил 6 декабрь куни соат 09:30 ларда Учқудуқ тумани «Дўстлик» маҳалласи ҳудудидан ўтган Учқудуқ шаҳар ички автомобиль йўлида Spark ва Lada автомобиллари тўқнашган. Маълум бўлишича, Straus trans zar МЧЖда ҳайдовчи вазифасида ишловчи фуқаро К.З. жамиятга тегишли Spark автомашинасини бошқариб бораётиб чапга бурилишни амалга ошираётган вақтида ўзи билан бир йўналишда Lada Vesta билан тўқнашиб йўл-транспорт ҳодисаси содир қилган.

Йўл-транспорт ҳодисаси оқибатида Lada Vesta автомашинаси қарама-қарши йўлнинг қатнов қисмига чиқиб ағанаган. Оқибатда Lada Vesta автомашина ҳайдовчи Л.Р. йўловчи С.Д. ва Spark автомашинаси ҳайдовчиси К.З. тан жароҳати олиб Учқудуқ тумани тиббиёт бирлашмасига мурожаат қилган.

Ҳозирда тўпланган ҳужжатлар бўйича терговга қадар текширув ҳаракатлари Учқудуқ туман ИИБ ЙҲХБ катта инспектори томонидан олиб борилмоқда.

Тўрақўрғонда «Зил» 51 ёшли велосипедчини уриб кетди.

2021 йил 4 декабрь куни соат 12:05 ларда «Катта Қурама» МФЙ ички йўлида юк машинаси билан ЙТҲ содир бўлган. Наманган вилояти ИИБ хабар беришича, Тўрақўрғон туманида яшовчи фуқаро (1996 йилда туғилган) МЧЖга тегишли бўлган «ГАЗ-53» юк машинасини бошқариб бораётиб, ҳаракат хавфсизлигини таъминлай олмай, йўлни кесиб ўтаётган велосипед ҳайдовчисини уриб юборган. Ҳодиса оқибатида фуқаро воқеа жойида вафот этган. Велосипед эгаси 1960 йилда туғилган, Тўрақўрғон туманида яшовчи фуқаро экани аниқланган.

Ушбу ҳолат бўйича Тўрақўрғон туман ИИБ ҳузуридаги ТБ томонидан 2021 йил 4 декабрь куни Жиноят кодексининг 266-моддаси 2-қисми (одам ўлимига сабабчи бўлган транспорт хавфсизлиги қоидаларини бузиш) билан жиноят иши қўзғатилган.

Попда Damas 12 ёшли қизнинг ўлимига сабабчи бўлди.

2021 йил 6 декабрь куни соат 09:00 ларда, Ғурумсарой–Хонобод–Чодак–Гулистон йўлининг 37-километридаги Поп тумани «Гулистон» МФЙ ҳудудида Damas пиёдани уриб кетгани хабар қилинди. Автомашинада бўлган фуқаро (Поп туманида яшовчи, 1985 йилда туғилган) Damas’ни бошқариб бораётиб, ҳаракат хавфсизлигини таъминлай олмай, йўлни кесиб ўтаётган пиёдани (2009 йилда туғилган) уриб юборган. Маълум қилинишича, қиз ота-онаси қарамоғида бўлиб, тумандаги мактабнинг 6-синфида ўқиган.

Ўқувчи қиз олган оғир тан жароҳати оқибатида шифохонада вафот этган.

Ушбу ҳолат бўйича Поп туман ИИБ ҳузуридаги ТБ томонидан 2021 йил 6 декабрь куни Жиноят кодексининг 266-моддаси 2-қисми билан жиноят иши қўзғатилган.