Сурхондарёда юк машинаси кўприкдан қулади, Қорақалпоғистонда Nexia билан тўқнашган Damas ҳайдовчиси вафот этди. ЙТҲ тафсилотлари

Ўзбекистон йўлларида сўнгги кунларда содир бўлган йўл-транспорт ҳодисалари тафсилотларини тақдим этамиз.

Сурхондарёда юк автомобили кўприкдан ағдарилди.

2021 йил 5 декабрь куни соат 11:00 ларда, Сурхондарё вилояти, Шўрчи туманида ҳайдовчи М.Д. юк автомобилида «Ҳурлик» МФЙ ҳудудидан ўтган ички йўлда, юк транспорт воситалари ўтиши учун мўлжалланмаган кўприкдан ҳаракатланиб ўтаётган вақтда, пастликка ағдарилиб бахтсиз ҳодиса содир бўлган.

Ҳодиса натижасида тан жароҳати олган фуқаролар йўқ. Ҳайдовчига ёрдам кўрсатилиб, ҳолат оқибатлари бартараф этилган.

Мазкур ҳодиса юзасидан Шўрчи тумани ИИБ ЙҲХБ томонидан суриштирув олиб борилмоқда.

Наманганда Nexia йўловчиси вафот этди.

2021 йил 1 декабрь куни соат 02:00 ларда, «Гўзал» МФЙ, Гўзал кўчасида, Наманган шаҳрида яшаган фуқаро (1984 йилда туғилган) Nexia-2 автомашинасини тегишли ҳужжатлар билан бошқариб бораётиб, ҳаракат хавфсизлигини таъминлай олмай, йўл четида тўхтаб турган, Наманган шаҳрида яшовчи фуқарога (1991 йилда туғилган) тегишли MAN юк автомашинасининг орқа томонига урилган.

Оқибатда Nexia автомашинасида бўлган йўловчи (Наманган шаҳрида яшаган, 1986 йилда туғилган) тан жароҳати олиб, воқеа жойида вафот этган ва Nexia автомашинаси ҳайдовчиси қўшма шикаст, ўнг оёқ болдир ва чап оёқ сон суягининг синиши ташхиси билан Республика шошилинч тез ёрдам илмий маркази Наманган филиалига ётқизилган.

Ушбу ҳолат бўйича Наманган шаҳар ИИБ ҳузуридаги ТБ томонидан 2021 йил 1 декабрь куни Жиноят кодексининг 266-моддаси 2-қисми (одам ўлимига сабаб бўлган транспорт бошқариш хавфсизлиги қоидаларини бузиш) билан жиноят иши қўзғатилган.

Қорақалпоғистонда Nexia билан тўқнашган Damas ҳайдовчиси вафот этди.

2021 йил 2 декабрь куни соат 19:00 ларда Қорақалпоғистон Республикаси Шуманай туманидан ўтган 4Р-177 автомобиль йўлининг 34-километрида ЙТҲ содир бўлган. Унда Cobalt автомашинаси қарама-қарши томондан ҳаракатланиб келаётган Damas билан тўқнашган.

Оқибатда Damas ҳайдовчиси туман шифохонасида вафот этган.