“Zil” va traktor bilan to‘qnashgan Lacetti haydovchisi halok bo‘ldi, Matiz bilan poyga o‘ynagan Nexia yo‘l chetidagi ayolni urib yubordi. YTH tafsilotlari
O‘zbekistonda so‘nggi kunlarda sodir bo‘lgan yo‘l-transport hodisalari tafsilotlarini taqdim etamiz
“Zil” va traktor bilan to‘qnashgan Lacetti haydovchisi voqea joyida halok bo‘ldi.
YTH Sirdaryo viloyati Mirzobod tumanidan o‘tgan M-34 avtomobil yo‘lining 127-kilometrida 1-dekabr kuni 21:30 atrofida sodir bo‘lgan. “Zil”, traktor va Lacetti transportlari o‘rtasida to‘qnashuv yuzaga kelgan.
Oqibatda Lacetti haydovchisi olgan tan jarohatlari oqibatida voqea joyida halok bo‘lgan. Mashinadagi ikki yo‘lovchi shifoxonaga yotqizilgan.
Nexia yo‘lni kesib o‘tayotgan velosiped haydovchisini urib yubordi.
Holat Jizzax viloyati Mirzacho‘l tumani hududigan o‘tuvchi Zafarobod—Arnasoy—Gagarin 4K-197 yo‘lining 75-kilometrida sodir bo‘lgan. Shu tumanning Yangidala qishlog‘ida yashovchi L.Q. boshqaruvidagi Nexia yo‘lni kesib o‘tayotgan velosipedchini urib yuborgan.
Oqibatda tumanning Toshkent qishlog‘ida yashovchi O‘.Q. bosh miya yopiq jarohati, bosh miya lat yeyishi, o‘ng o‘mrov suyagining yopiq sinib siljishi tashxisi bilan shifoxonaga yotqizilgan. Holat yuzasidan tergovga qadar tekshiruv harakatlari o‘tkazilmoqda.
Jizzaxda Nexia va Matiz to‘qnashishi oqibatida yo‘lovchi shifoxonaga yotqizildi.
Jizzax viloyat Ichki ishlar boshqarmasining 2-dekabr kuni xabar berishicha, holat Jizzax shahrining Amir Temur mahallasi hududidan o’tgan Jizzax—G’allaorol 4R-38 yo’lining 25- kilometrida sodir bo‘lgan. Sharof Rashidov tumani “Qahramon” mahallasida yashovchi Yu.S. boshqaruvidagi Nexia qarama-qarshi yo‘nalishga o‘tayotgan vaqtda “Amir Temur” mahallasida yashovchi F.X. boshqaruvidagi Matizga to‘qnashgan.
Oqibatda Baxmal tumani “Do‘stlik” mahallasida yashovchi Matiz yo‘lovchisi Sh.A. shifoxonaga og‘ir tan jarohati bilan yotqizilgan. Holat yuzasidan jinoyat ishi qo‘zg‘atilgan.
Matiz bilan poyga o‘ynagan Nexia yo‘l chetidagi ayolni urib yubordi.
Namangan viloyati Uychi tumani “G‘ayrat” mahallasidan o‘tgan Uychi—Uchqo‘rg‘on yo‘lida 24-noyabr kuni soat 05:00 atrofida YTH sodir bo‘lgan. Yuqori tezlikda harakatlanib kelayotgan Nexia haydovchisi yonida ketayotgan Matiz bilan poyga o‘ynab, o‘z uyi oldini supirayotgan ayolni (1967-yilda tug‘ilgan) urib yuborgan.
Haydovchi jabrlanuvchiga yordam bermay, voqea joyida qochib ketgan. Tibbiy yordam ko‘rsatilmagan ayol voqea joyida halok bo‘lgan.
Boshqaruvni yo‘qotgan Lacetti yo‘l chetidagi beton to‘siqqa urildi.
Yo‘l-transport hodisasi Jizzax viloyati Paxtakor qishlog‘i hududidan o‘tuvchi Yangiyer—Chimqo‘rg‘on 4R-32 yo‘lining 70-kilometrida sodir bo‘lgan. Paxtakor tumani “Suvonobod” mahallasida yashovchi X.X. Lacetti boshqaruvini yo‘qotib, yo‘l chetidagi beton to‘siqqa urilgan.
Oqibatda haydovchi bosh miya yopiq jarohati, bosh miya lat yeyishi, kallaning ensa sohasi yirtilgan jarohati bilan, shuningdek,, mashinada bo‘lgan haydovchining qo‘shnisi M.K. bosh miya yopiq jarohati va koma holati tashxislari bilan shifoxonaga yotqizilgan. Holat yuzasidan jinoyat ishi qo‘zg‘atilgan.
Jizzaxda ikki Nexia to‘qnashuvida yo‘lovchi jarohatlandi.
Jizzax IIBning 2-dekabr kuni xabar qilishicha, Jizzax shahrining “Obod” mahallasida hududida Sharof Rashidov Qangli qishlog‘ida yashovchi E.Y. boshqaruvidagi Nexia va shu tumanning “Mo‘lkanlik” mahallasida yashovchi O.Z. boshqaruvidagi Nexia to‘qnashgan.
YTH oqibatida O.Z.ga tegishli Nexia salonida bo‘lgan Jizzax shahri “Zilol” mahallasida yashovchi J.Z. o‘ng o‘mrov suyagining yopiq siljib sinishi tashxisi bilan shifoxonaga yotqizilgan. Holat yuzasidan tergovga qadar tekshiruv o‘tkazilmoqda.
