Surxondaryoda yuk mashinasi ko‘prikdan quladi, Qoraqalpog‘istonda Nexia bilan to‘qnashgan Damas haydovchisi vafot etdi. YTH tafsilotlari

O‘zbekiston yo‘llarida so‘nggi kunlarda sodir bo‘lgan yo‘l-transport hodisalari tafsilotlarini taqdim etamiz.

Surxondaryoda yuk avtomobili ko‘prikdan ag‘darildi.

2021-yil 5-dekabr kuni soat 11:00 larda, Surxondaryo viloyati, Sho‘rchi tumanida haydovchi M.D. yuk avtomobilida “Hurlik” MFY hududidan o‘tgan ichki yo‘lda, yuk transport vositalari o‘tishi uchun mo‘ljallanmagan ko‘prikdan harakatlanib o‘tayotgan vaqtda, pastlikka ag‘darilib baxtsiz hodisa sodir bo‘lgan.

Hodisa natijasida tan jarohati olgan fuqarolar yo‘q. Haydovchiga yordam ko‘rsatilib, holat oqibatlari bartaraf etilgan.

Mazkur hodisa yuzasidan Sho‘rchi tumani IIB YHXB tomonidan surishtiruv olib borilmoqda.

Namanganda Nexia yo‘lovchisi vafot etdi.

2021-yil 1-dekabr kuni soat 02:00 larda, “Go‘zal” MFY Go‘zal ko‘chasida, Namangan shahrida yashagan fuqaro (1984-yilda tug‘ilgan) Nexia-2 avtomashinasini tegishli hujjatlar bilan boshqarib borayotib, harakat xavfsizligini ta’minlay olmay, yo‘l chetida to‘xtab turgan, Namangan shahrida yashovchi fuqaroga (1991-yilda tug‘ilgan) tegishli MAN yuk avtomashinasining orqa tomoniga urilgan.

Oqibatda Nexia avtomashinasida bo‘lgan yo‘lovchi (Namangan shahrida yashagan, 1986-yilda tug‘ilgan) tan jarohati olib, voqea joyida vafot etgan va Nexia avtomashinasi haydovchisi qo‘shma shikast, o‘ng oyoq boldir va chap oyoq son suyagining sinishi tashxisi bilan Respublika shoshilinch tez yordam ilmiy markazi Namangan filialiga yotqizilgan.

Ushbu holat bo‘yicha Namangan shahar IIB huzuridagi TB tomonidan 2021-yil 1-dekabr kuni Jinoyat kodeksining 266-moddasi 2-qismi (odam o‘limiga sabab bo‘lgan transport boshqarish xavfsizligi qoidalarini buzish) bilan jinoyat ishi qo‘zg‘atilgan.

Qoraqalpog‘istonda Nexia bilan to‘qnashgan Damas haydovchisi vafot etdi.

2021-yil 2-dekabr kuni soat 19:00 larda Qoraqalpog‘iston Respublikasi Shumanay tumanidan o‘tgan 4R-177 avtomobil yo‘lining 34-kilometrida YTH sodir bo‘lgan. Unda Cobalt avtomashinasi qarama-qarshi tomondan harakatlanib kelayotgan Damas bilan to‘qnashgan.

Oqibatda Damas haydovchisi tuman shifoxonasida vafot etgan.