Ўзбекистонда сўнгги кунларда содир бўлган ЙТҲлар оқибатида 5 киши вафот этди, 3 нафари жароҳат олди

Ўзбекистон йўлларида содир бўлган ҳодисалар ҳақида батафсил маълумотлар тақдим этамиз.

Юнусободда Nexia-3 вояга етмаган болани уриб юборди.

Тошкент шаҳар Юнусобод туманида 3 декабрь куни соат 17:00 да Ифтихор ва Шароф Рашидов кўчалари кесишмасида Nexia-3 автомобиль ҳайдовчиси Д.Б. (1987 йилда туғилган) вояга етмаган пиёдани уриб юборган.

ЙТҲ оқибатида пиёда М.А. (2006 йилда туғилган) бадан шикастлари билан автомобиль ҳайдовчиси томонидан тиббиёт муассасасига олиб борилган.

Мазкур факт бўйича тергов олди текшируви ўтказилмоқда, унинг натижаларига кўра қонуний чора кўрилиши маълум қилинган.

Қашқадарёда Lacetti қарама-қарши йўналишдан келаётган «КамАЗ» билан тўқнашди.

Қашқадарё вилоятида Lacetti автомобили олдиндаги автобусни қувиб ўтиш мақсадида қарама-қарши йўналишга ўтиб кетган ва тўғрисидан келган «КамАЗ» билан тўқнашган.

ЙТҲ оқибатида Lacetti’даги 2 нафар йўловчи ҳалок бўлган, ҳайдовчи ва яна бир йўловчи тан жароҳати олиб шифохонага ётқизилган.

Аниқланишича, вафот этган шахслар ака-ука бўлган.

Деновда «Жигули» пиёдани ўлимига сабабчи бўлди

2021 йил 4 декабрь куни кечки соат 20:30 ларда Сурхондарё вилояти Денов туманида «Тотувлик» маҳалласидан ўтган автомобиль йўлида «ВАЗ 2106» қатнов қисмини кесиб ўтаётган пиёдани уриб юборган.

Пиёда олган тан жароҳати оқибатида шифохонада вафот этган.

Шўрчи туманида икки Damas тўқнашиши оқибатида йўловчи ҳалок бўлди.

2021 йил 6 декабрь куни Сурхондарё вилояти Шўрчи туманида ўтган М-41 автомобиль йўлининг 1503-километрида Damas қарама-қарши йўналишдан келаётган бошқа Damas автомашинаси билан тўқнашган.

Тўқнашув оқибатида автомобилларнинг бирида йўловчи сифатида кетаётган 25 ёшли фуқаро тан жароҳати олиб вафот этган.

Воқеа юзасидан тергов-суриштирув ҳаракатлари олиб борилмоқда.

Мирзо Улуғбек туманида Spark ёниб кетди.

Дастлабки маълумотларга кўра, 2021 йил 7 декабрь куни соат 19:40 ларда, Тошкент шаҳар, Мирзо Улуғбек тумани, КХАЙ кўчасида ҳайдовчи Ж.М. (1990 йилда туғилган) Spark автомобилда ҳаракатланаётиб бошқарувни йўқотган ва йўл четидаги устунга урилган. Зарб оқибатида автомобилда ёнғин юзага келган.

Ёнғин ўт ўчирувчилар томонидан бартараф этилган. Ҳодиса натижасида тан жароҳати олган фуқаролар йўқ.

Мазкур ҳолат юзасидан Тошкент шаҳар ИИББ ЙҲХБ ходимлари томонидан суриштирув олиб борилмоқда.

Қаршида Howo юк машинаси ва Tico тўқнашди.

2021 йил 6 декабрь куни соат 14:20 ларда, Қашқадарё вилояти, Қарши шаҳар, Амир Темур кўчасида ҳайдовчи Р.Р. (1935 йилда туғилган) Tico автомобилда ҳаракатланаётиб, ўзи билан бир йўналишда, ён қаторда бўлган ҳайдовчи, 1963 йилда туғилган М.Т. бошқарувидаги Howo юк автомобилининг йўлига чиқиб кетиши оқибатида тўқнашув содир бўлган.

ЙТҲ натижасида тан жароҳати олган фуқаролар йўқ.

Ҳодиса юзасидан Қарши шаҳар ИИО ФМБ ЙҲХБ ходимлари томонидан суриштирув олиб борилмоқда.

Сергелида 8 та машина иштирокида ЙТҲ содир бўлди.

Тошкент шаҳри, Сергели тумани, Меҳригиё кўчасида 6 декабрь куни соат 12:30 ларда 8 та автомашина иштирокида ЙТҲ содир бўлди. Воқеа оқибатида Cobalt ҳайдовчиси жароҳат олган ва шифохонага олиб кетилган.

Воқеага светофорга яқинлашган цемент ташувчи юк машинасининг тормози тизимидаги носозлик сабаб бўлган. Оқибатда юк машинаси Cobalt автомобилига бориб урилган ва светофорда турган бошқа автомобилларга зарар етказган.

Бундан ташқари, 6 декабрь куни Сергели туманида юк машинаси иштирокида яна бир ЙТҲ содир бўлди. Унда Mercedes-Benz юк машинаси ва Nexia-3 автомобили тўқнашган.

Воқеага Nexia-3 ҳайдовчиси ўз йўлидан ҳаракатланиб келаётган юк машинасига йўл бермагани сабаб бўлган.