Қозоғистон парламенти республика Жиноят кодексидан ўлим жазосини чиқариб ташлашни таклиф қилмоқда. Мажлис (қуйи палата) Жиноят кодексига ушбу масала бўйича ўзгартириш ва қўшимчалар киритиш тўғрисидаги қонун лойиҳасини маъқуллаган, деб ёзади «Коммерсантъ».
«Давлат раҳбари жорий йилнинг 16 ноябрь куни Жамоатчилик ишончи миллий кенгаши йиғилишида Қозоғистонда ўлим жазосини ҳеч қандай шартларсиз бекор қилиш кераклигини айтганди. Шу муносабат билан кенгаш ўлим жазосини жиноят қонунчилигидан чиқариб ташлаш бўйича тегишли тузатишлар тайёрлади», — дейилади Мажлиснинг Қонунчилик ва суд-ҳуқуқ ислоҳотлари кенгаши хулосасида.
Қонунчиларнинг фикрича, Қозоғистонда ўлим жазосининг бекор қилиниши миллий қонунчиликни янада уйғунлаштиришга ёрдам беради, шунингдек, энг олий конституциявий қадрият – яшаш ҳуқуқини таъминлаш имконини беради.
Қозоғистонда амалдаги Жиноят кодексининг 17 та моддасида ўлим жазоси кўзда тутилган, бироқ 2003 йилдан буён уни қўллашга мораторий киритилган.
13 октябрь куни Қозоғистон Мажилиси ўлим жазоси билан жазолаш бўйича Жиноят кодексига ўзгартириш ва қўшимчалар киритиш тўғрисидаги қонун лойиҳасини биринчи ўқишда маъқуллаган эди. Тузатишлар 13 та моддадан ўлим жазосини чиқариб ташлаш ва уни фақат ҳарбий характердаги ўта оғир жиноятлар учун қолдиришни таклиф қилади. Хусусан, агрессив урушни бошлаш ва олиб бориш, оммавий қирғин қуролларини қўллаш, ҳарбий асирларни ва тинч аҳолини қатл этиш бўйича уруш қонунлари ва одатларини бузиш, шунингдек, уруш пайтида содир этилган геноцид учун ўлим жазосини сақлаб қолиш таклиф қилинган.
Аммо мамлакат президенти Қосим-Жўмарт Тўқаев парламентга ҳар қандай ҳолатда ҳам ўлим жазосини бекор қиладиган қонун тайёрлаш таклифи билан чиқди.
Маълумот учун, 2021 йил ҳолатида бутун дунёда фақат 53 та давлат ўлим жазосини қўлламоқда. Ўзбекистонда ўлим жазоси 2008 йил 1 январдан бошлаб бекор қилинган.
Изоҳ (0)