Washington Post журналисти Жамол Қошиқчининг ўлдирилишида гумон қилинган шахслардан бири Францияда қўлга олинди. Бу ҳақда Meduza хабар берди.
РТЛ маълумотларига кўра, Саудия Арабистони фуқароси бўлган 33 ёшли Холид Айид ал-Отайбий 7 декабрь куни Парижнинг Шарл де Голл аэропортида чегара назоратидан ўтиш чоғида тўхтатилган.
У Ар-Риёдга учиб кетмоқчи эди, бироқ унинг исми Туркияда чиқарилган халқаро ҳибсга олиш ордерига мувофиқ Интерпол қидируви базасига киритилгани маълум бўлди. Анқарада ал-Отайбий Саудия қироллик гвардиясининг Қошиқчини ўлдиришида иштирок этган 20 та махсус кучларидан бири бўлган, деб ҳисобланади.
Ҳибсга олинган шахс Туркияга экстрадиция қилиниши мумкин.
Саудия Арабистонининг Франциядаги элчихонаси Холид Айид ал-Отайбийнинг журналистни ўлдиришга алоқаси йўқлигини маълум қилди ва уни зудлик билан озод этишни талаб қилди.
Эслатиб ўтамиз, Жамол Қошиқчи The Washington Post журналисти бўлган ва ўз мақолаларида Саудия Арабистони ҳукуматини танқид қилган. У 2018 йилнинг октябрь ойида Саудия Арабистонининг Истанбулдаги элчихонасида боши танасидан жудо қилиниб ўлдирилган. Унинг жасади ҳозиргача топилмаган.
Туркия ҳукумати, АҚШ Сенати ва Марказий разведка бошқармаси журналистни ўлдириш ҳақидаги буйруқни Саудия Арабистонининг меросхўр шаҳзодаси Муҳаммад ибн Салмон берганлигини маълум қилган. Саудия Арабистони ҳукумати эса журналистнинг ўлимини куч тузилмаларининг шахсий ташаббуси деб атаган.
Жиноятда гумонланганлар Саудия Арабистони судига топширилган. 2019 йилнинг декабрь ойида уларнинг беш нафари ўлим жазосига ҳукм қилинган, яна уч нафарига тайинланган қамоқ жазосининг умумий муддати 24 йилни ташкил этган.
2020 йилнинг сентябрида беш кишига тайинланган ўлим жазоси журналистнинг ўғиллари сўровига асосан қамоқ жазосига алмаштирилган. 2020 йилнинг май ойида журналистнинг ўғиллари отасининг ўлимида айбдор бўлганларни кечиришини маълум қилган. Бироқ журналистнинг дўсти Қошиқчининг ўғиллари айбдорларни кечириш ҳақида ўз ихтиёри билан маълум қилганига шубҳа билдирган.
Аввалроқ Қошиқчининг ўлдирилиши тўғрисидаги ҳужжатдан уч кишининг исми сирли равишда ғойиб бўлгани ҳақида хабар берилган.
Изоҳ (0)