Олаф Шольц расман Германиянинг янги канцлери этиб сайланди

Олаф Шольц Бундестагда кўпчилик овоз билан расман Германиянинг янги канцлери этиб сайланди, деб ёзади Der Spiegel.

Шолсга 395 нафар депутат овоз берди, сайланиш учун унга 369 та овоз зарур эди. 8 декабрь кунининг ўзида Олаф Шольц канцлер сифатида қасамёд қилади. Олаф Шольц Германиянинг тўққизинчи федерал канцлерига айланди. У ушбу лавозимда Германия ҳукуматини 16 йил бошқарган Ангела Меркелнинг ўрнини эгаллади.

Шолс сайланганидан кейин Германия канцлери веб-сайтининг домен номи бундесканзлерин.деъдан бундесканзлер.деъга ўзгартирилди.

Олаф Шольц 63 ёшда, у Германия социал-демократик партияси аъзоси. Сўнгги уч йил давомида у Меркель ҳукуматида вице-канцлер ва молия вазири лавозимларида ишлаган. 2011—2018 йилларда Олаф Шольц Гамбург шаҳрининг раҳбари сифатида фаолият кўрсатган.

Германияда 27 сентябрь куни бўлиб ўтган  парламент сайловларида молия вазири Олаф Шольц раҳбарлигидаги Социал-демократик партия (ГСДП) ғалаба қозонганди. Унга сайловчиларнинг 25,7 фоизи овоз берган. Янги ҳукуматни тузишда Социал-демократик партиядан ташқари «Яшиллар» ва Эркин демократик партиянинг иштироки зарур эди. Учала партия раҳбарлари, 7 декабрь куни ниҳоят коалиция шартномасини имзолади.