Россиянинг Кемерово вилояти (Кузбасс)даги портлаш содир бўлган «Листвяжная» кўмир конида қутқарувчилар яна 13 кишининг жасадини топди. Бу ҳақда Фавқулодда хизматдаги манбаларга таяниб, «РБК» хабар берди.
«Сешанба куни эрталаб (7 декабрь) 13 кишининг жасади топилди, улар орасида бир қутқарувчи ҳам бор. Жасадлар ер юзасига олиб чиқилмоқда. Қолган икки қурбонни қидириш ишлари олиб борилмоқда», — деган манбалардан бири.
«РБК» қидирув ишлари давом этаётганини қайд этди. «Ҳар бир сменада тўрттадан олтитагача қутқарув бўлими ишлаяпти. Шахтадаги газ ҳолати барқарор. Россия ФВВнинг Тоғ-кон қутқарув хизмати бўлинмалари кечаю кундуз насос билан сувни чиқариб ташламоқда, ҳаво намуналарини олиб, вентиляция мосламаларини тикламоқда», — деган ФВВ ҳудудий бошқармаси «РБК»га.
Кемерово вилояти губернатори Сергей Цивилевнинг маълум қилишича, 7 декабрь ҳолатига кўра, бир нафар кончи ва бир нафар қутқарувчи шифохонада, жабрланганларнинг 96 нафари — 54 нафар кончи ва 42 нафар қутқарувчи уйда даволанмоқда. Беш нафар кончи ва уч нафар қутқарувчи тўлиқ соғайиб кетган.
Эслатиб ўтамиз, 25 ноябрь куни Кемерово вилоятидаги «Листвяжная» кўмир конида авария юз берганди. Воқеа содир бўлган пайтда конда жами 285 нафар ишчи бўлган, улардан 46 нафари ташқарига чиқа олмаган. Уларга ёрдам бериш учун қутқарув гуруҳлари сафарбар қилинган. Жараёнда Фавқулодда вазиятлар вазирлигининг беш нафар ходими ҳалок бўлган. Ҳодиса қурбонларининг умумий сони 51 кишини ташкил этмоқда.
Россия президенти Владимир Путин авария сабабини «хавфсизлик чораларининг такрорий бузилиши» деб атади. «Ростехнадзор»да эса ҳодисанинг асосий версияси метаннинг кескин отилиб чиқиши деб ҳисобланмоқда.
Кондаги авариядан кейин иккита жиноий иш қўзғатилди: хавфли ишлаб чиқариш объектларида саноат хавфсизлиги талабларининг бузиши билан икки ёки ундан ортиқ одамнинг ўлимига сабаб бўлган эҳтиётсизлик; тасодифан икки ёки ундан ортиқ шахснинг ўлимига сабаб бўлган эҳтиётсизлик.
Изоҳ (0)