Буюк Британияда «омикрон» штамми туфайли мамлакатга кириш тартиби кучайтирилди

Буюк Британияда 7 декабрь куни эрталаб соат 4:00 дан бошлаб мамлакатга кирувчи 12 ёшдан каттанинг барчаси ПЗР ёки LFD-тестининг(иммунохроматографик таҳлил усули билан ўтказилади) салбий натижасини тақдим этиши керак. Бу ҳақда Британия ҳукуматига таяниб, «РБК» хабар берди. Тестлар Британияга жўнаб кетишдан олдин ўтказилган бўлиши керак.

Шунингдек, 6 декабрдан бошлаб Нигерия саёҳат учун «қизил рўйхат»даги мамлакатлар қаторига киритилади. Яъни сўнгги ўн кун ичида Нигерияда бўлган кишиларга Британияга кириш тақиқланади. Тақиқ Буюк Британия ва Ирландия фуқароларига тааллуқли эмас, деди қироллик соғлиқни сақлаш вазири Сажид Жовид Twitter’да. Британияликлар ва ирландлар мамлакатга қайтиши мумкин, аммо кейин белгиланган жойда карантиндан ўтиши зарур.

Буюк Британия бош вазири Борис Жонсоннинг сўзларига кўра, олимлар янги «омикрон» штаммининг тарқалиш тезлиги ва вакциналарнинг унга қарши самарадорлигини аниқлагунга қадар, Британияда ушбу штамм тарқалишини секинлаштириш учун янги чекловлар амалда бўлиши зарур. Британия Соғлиқни сақлаш хавфсизлиги агентлиги маълумотларига кўра, мамлакатда «омикрон» штаммига чалиниш бўйича жами 160 та ҳолат тасдиқланган.

Коронавируснинг янги «омикрон» штамми биринчи марта 11 ноябрь куни Жанубий Африкада топилган. Британиялик олимларнинг таъкидлашича, янги штамм тарқалиш тезлиги туфайли аввалгиларига, жумладан дельтага қараганда хавфлироқ бўлиши мумкин. Жаҳон соғлиқни сақлаш ташкилоти мавжуд вакциналар ушбу штаммга қарши самарасиз бўлиши мумкин, деган шубҳалар туфайли «омикрон»ни хавфли деб тан олди. Ташкилот, шунингдек, илгари коронавирусни бошдан ўтказганларда «омикрон» билан қайта касалланиш эҳтимоли юқорилигини маълум қилди.

Кейинроқ Бирлашган Миллатлар Ташкилоти янги штамм туфайли мамлакатлараро ҳаракатланишга қўйилаётган тақиқларни самарасиз ва адолатсиз деб атади. «Вирус ҳақиқатан ҳам чегара билмаслигини ҳисобга олсак, бирор мамлакат ёки минтақани ажратиб қўювчи саёҳат чекловлари адолатсиз, репрессив ва самарасиздир», — деди БМТ Бош котиби Антонио Гутериш.

29 ноябрь куни ЖССТ дунёда «омикрон» штаммидан ўлим ҳолатлари кузатилмагани ҳақидаги маълумотларни эълон қилди.