Ҳиндистон шимоли-шарқидаги Нагаленд штатида қуролли кучлар тинч аҳолини исёнчи гуруҳ деб ўйлаб, ўққа тутди. AFP маълумотларига кўра, 13 киши, Reuters агентлигига кўра — 14 нафар тинч аҳоли вакили ва бир нафар хавфсизлик ходими ҳалок бўлган.
Ҳодиса Мон округидаги (Мьянма билан чегарадош) Отинг қишлоғи ва унинг атрофида содир бўлган.
«Аскарларда ҳудуддаги қандайдир жангарилар ҳаракати ҳақида разведка маълумотлари бор эди, улар юк машинасини кўриб, кончиларни исёнчилар деб янгилишган ва ўт очган, натижада олти ишчи ҳалок бўлган», — дея полиция ходимларидан бири аноним қолиш шарти билан Reuters агентлигига маълум қилди.
Шундан сўнг, унинг сўзларига кўра, отишма ҳақидаги хабар бутун қишлоққа тарқалган ва ҳудуднинг юзлаб аҳолиси ҳарбий лагерни ўраб олган. Томонлар ўртасида тўқнашувлар содир бўлиб, унда яна саккиз нафар тинч фуқаро ва бир нафар хавфсизлик ходими ҳалок бўлган.
«Ҳозир бутун Мон округида вазият жуда таранг. 13 кишининг ўлими тасдиқланган, улардан бири Нагалендга бошқа жойдан келган ишчи эди», — деди штат полицияси ходими Сандип М.Тамгаж AFP агентлигига.
Ҳиндистон ички ишлар вазири Амит Шоҳ тинч аҳоли ўлими ҳақидаги хабардан қайғуда эканини билдирди. Нагаленд бош вазири Нейфиу Рио воқеа юзасидан текширув олиб борилиши ва айбдорлар жавобгарликка тортилишини айтди. У ушбу ҳодисани разведкадаги муваффақиятсизлик деб атади.
Изоҳ (0)