Шавкат Мирзиёев Қозоғистонга давлат ташрифи арафасида ушбу мамлакат нашрига икки томонлама муносабатларнинг ҳолати ва истиқболлари ҳамда Марказий Осиёдаги ҳамкорликка бағишланган катта интервью берди. Унда президент Афғонистондаги вазият ҳақида ҳам фикр билдирган.
«Агар мувофиқлаштирилган самарали чоралар кўрилмаса, Афғонистон узоқ вақт давомида минтақавий хавфсизликка янги таҳдидлар ва таҳдидлар манбаси бўлиб қолиши мумкин. Ушбу мамлакатда тинчлик ва барқарорликка эртароқ эришилиши унинг ривожланишига йўл очади, минтақавий ва халқаро аҳамиятга молик йирик иқтисодий ва энергетика лойиҳаларини амалга ошириш учун янги стратегик имкониятлар яратади», — деган президент «Yegemen Qazaqstan» ва «Казахстанская правда» саҳифаларида чоп этилган интервьюда.
Шавкат Мирзиёевнинг таъкидлашича, Евросиё ва Жанубий Осиё, Шарқий ва Ғарбий Осиё ўртасида табиий қуруқлик кўприги бўлган Афғонистоннинг географик жиҳатдан қулай жойлашуви унинг трансминтақавий алоқаларни ривожлантиришдаги аҳамиятини белгилайди. Афғонистоннинг иқтисодий жиҳатдан тикланиши бу ерда барқарор ва узоқ муддатли тинчлик ўрнатишнинг муҳим шартидир.
«Шу нуқтаи назардан, менинг фикримча, вазиятнинг кескинлашувига йўл қўймаслик учун янги ҳокимият билан мулоқотни ривожлантириш, афғон халқига ижтимоий-иқтисодий ва гуманитар ёрдам кўрсатишни давом эттириш зарур. Бу вазиятда Афғонистонда кенг кўламли гуманитар инқироз юзага келиши ва унинг халқаро майдонда яккаланиб қолишига йўл қўймаслик ниҳоятда муҳим аҳамият касб этади», — деб қайд этган президент.
Эслатиб ўтамиз, Шавкат Мирзиёев 9 сентябрь куни бўлиб ўтган ЎзЛиДеПнинг Х қурултойида «Қўшни Афғонистон заминида тинчлик ва осойишталикни таъминлашга, жафокаш афғон халқига қўлимиздан келган барча ёрдамни аямаймиз», — деб айтганди. Давлат раҳбари 5 октябрь куни Туркманистон президенти Гурбангули Бердимуҳамедов билан музокараларда Афғонистон халқига зарур инсонпарварлик ёрдамини кўрсатишни давом эттиришга тайёрлигини яна бир бор айтиб ўтган. Музокараларда Афғонистонда тинчлик ва барқарорлик бутун Марказий Осиё минтақасида барқарор тараққиёт гарови экани таъкидланган.
Президент 21 сентябрь куни БМТ Бош ассамблеясининг 76-сессиясида Афғонистонни яккалаб, уни муаммолар гирдобига ташлаб қўйиш мумкин эмаслигини, 12 ноябрь куни Туркий кенгаш саммитида Афғонистоннинг янги ҳукумати билан мулоқотларда ёндашувлар умумий ва якдил бўлиши лозимлигини айтганди.
Изоҳ (0)