Қашқадарё вилояти Қарши шаҳрида 10 август куни пиёдалар йўлакчасидан ўтаётган аёл ва унинг аравачадаги фарзандини Nexia уриб юборгани хабар қилинганди. Автомашина ҳайдовчисига суд ҳукми ўқилди, деб хабар бермоқда вилоят Ички ишлар бошқармаси.
Қайд этилишича, кечки 21:10 да шаҳарнинг Мустақиллик кўчасида ҳайдовчи Фирдавс Эргашев бошқарувидаги Nexia йўлнинг пиёдалар ўтиш жойидан кесиб ўтаётган аёл ва унинг болалар аравачасидаги ҳали бир ёшга ҳам етмаган фарзандини уриб юборган. Оқибатда бола оғир тан жароҳати олиб, шаҳар шифохонасига ётқизилган. Чақалоқ кўрсатилган тиббий ёрдамга қарамасдан, шифохонада вафот этган.
«Қамалсин. Қонуний жазо олишини хоҳлайман», — деган суд жараёнида ЙТҲ оқибатида фарзанди вафот этган аёл.
Таъкидланишича, ҳайдовчига нисбатан Жиноят кодексининг 266-моддаси 2-қисми (одам ўлимига сабаб бўлган транспорт воситалари ҳаракати ёки улардан фойдаланиш хавфсизлиги қоидаларини бузиш) билан айбдор деб топилган ва 2 йил-у 6 ой муддатга барча турдаги транспорт воситаларини бошқариш ҳуқуқидан маҳрум қилиниб, 6 йилга озодликдан маҳрум қилиш жазоси тайинланган.
Эслатиб ўтамиз, Қашқадарё вилоятида 2021 йилнинг январь—сентябрь ойлари мобайнида 369 та ЙТҲ содир бўлган. Оқибатда 181 нафар инсон вафот этган, шундан 31 нафари ёш бола бўлган.
Изоҳ (0)